2021-yil yakuniga qadar “tibbiyot brigadalari”ga biriktirilgan 50 mingdan ziyod hamshiralar to‘liq o‘qitiladi. Bu haqda Prezident Shavkat Mirziyoyev raisligida o‘tkazilgan yig‘ilishda davlat rahbari mas’ullarga topshiriq berdi, deya xabar bermoqda “Daryo” muxbiri.
“Sog‘liqni saqlash vaziri birinchi o‘rinbosari Amrillo Inoyatov bir oy muddatda birlamchi bo‘g‘inda davolash lozim bo‘lgan kasalliklar bo‘yicha ko‘rsatiladigan bepul tibbiy xizmatlar paketini amaliyotga kiritsin.
Ishmetov, Xojiboyev ikki hafta muddatda birlamchi tibbiyot muassasalarini dori va tibbiyot vositalari bilan qo‘shimcha ta’minlashga, joriy yil investitsiya loyihalarini optimizatsiyasi hisobidan 165 milliard so‘m ajratsin.
Bunda, viloyat hokimlari bilan birga, bir hafta muddatda investitsiya loyihalarini maqbullashtirish hisobiga har bir viloyat kesimida iqtisod qilinadigan mablag‘larni aniqlasin.
Buning evaziga, birlamchi tibbiyot muassasalarida aholi jon boshiga dori-darmon uchun ajratilayotgan mablag‘, 3 baravarga ko‘payadi.
Inoyatov ikki hafta muddatda “tibbiyot brigadalari”ga biriktirilgan 50 mingdan ziyod hamshiralarni tayyorlash grafigini tasdiqlab, viloyat, tuman va shahar hokimlari bilan birga yil yakuniga qadar to‘liq o‘qitishni tashkil qilsin.
Bunda, hamshiralar funksiyalarini ko‘paytirish orqali, oilaviy shifokorlar ish yuklamasini qisqartirish lozim. Hamshira hamshiraligini qilsin”, – dedi davlat rahbari.
Prezident Jahon sog‘liqni saqlash tashkiloti bilan hamkorlikda oilaviy shifokorlar malakasini oshirish dasturlarini yo‘lga qo‘yish bo‘yicha mas’ullarga topshiriq berdi.
Bundan avval Shavkat Mirziyoyev 20 ta tumanning tibbiyot birlashmalari faoliyatini va olis hududlarga shifokorlarni jalb qilish ishlari sust olib borilayotganini keskin tanqid qilgani hamda Andijon, Xorazm va Toshkent viloyatlari aholisi tibbiyotdagi ishlar ahvolidan norozi ekani haqida xabar berilgandi.
Izoh (0)