Bugungi kunda O‘zbekistonda 250 dan ziyod kasalliklarning 87 tasini birlamchi bo‘g‘inda davolash uchun barcha imkoniyatlar mavjud. Bu haqda Prezident Shavkat Mirziyoyev raisligida o‘tkazilgan yig‘ilishda qayd etildi, deya xabar bermoqda “Daryo” muxbiri.
“Bugungi kunda 250 dan ziyod kasalliklarning 87 tasini – yuqori qon bosimi, oshqozon-ichak, nafas yo‘llari surunkali kasalliklari, kamqonlik kabi kasalliklarni birlamchi bo‘g‘inda davolash, buning uchun 20 turdagi laboratoriya va diagnostika tekshiruvlarini o‘tkazish uchun barcha imkoniyatlar mavjud. Buning uchun birlamchi bo‘g‘inni malakali kadrlar bilan hamda shoshilinch yordam uchun zarur 50 turdagi dori va 16 turdagi tibbiyot vositalari bilan ta’minlash kerak bo‘ladi.
Shu bois joriy yil 1-iyuldan boshlab, surunkali kasalliklarni birlamchi bo‘g‘inda davolash bo‘yicha yangi tizim joriy etiladi. Bunda, birinchi bosqichda Sirdaryo viloyatida oilaviy shifokor punkti va poliklinikalar orqali erta o‘limning asosiy sababi bo‘lgan yurak va qon-tomir kasalliklarini davolash uchun aholi dori vositalari bilan bepul ta’minlanadi.
Yil yakuniga qadar Sirdaryoda ushbu kasalliklarni 10 foizga kamaytirishga erishganda ham, birgina shoshilinch yordam uchun sarflanayotgan 500 million so‘m budjet mablag‘lari tejaladi. Ushbu tejalgan mablag‘larni kelgusida surunkali nafas va oshqozon-ichak kasalliklarini birlamchi bo‘g‘inda davolashga yo‘naltirish imkoni paydo bo‘ladi”, – dedi davlat rahbari.
Prezident Sog‘liqni saqlash vaziri birinchi o‘rinbosari Amrillo Inoyatovga bir oy muddatda birlamchi bo‘g‘indagi yurak qon-tomir kasalliklarini davolash bo‘yicha protokollarni tasdiqlab, amaliyotga joriy etishi lozimligini ta’kidladi.
Bundan avval Shavkat Mirziyoyev tibbiyot tizimida 5 ta yo‘nalishda jiddiy o‘zgarishlar qilinishini aytgani, Andijon, Xorazm va Toshkent viloyatlari aholisi tibbiyotdagi ishlar ahvolidan norozi ekani hamda Shavkat Mirziyoyev 20 ta tumanning tibbiyot birlashmalari faoliyati tanqid qilgani haqida xabar berilgandi.
Izoh (0)