2021 йил якунига қадар «тиббиёт бригадалари»га бириктирилган 50 мингдан зиёд ҳамширалар тўлиқ ўқитилади. Бу ҳақда Президент Шавкат Мирзиёев раислигида ўтказилган йиғилишда давлат раҳбари масъулларга топшириқ берди, дея хабар бермоқда «Дарё» мухбири.
«Соғлиқни сақлаш вазири биринчи ўринбосари Амрилло Иноятов бир ой муддатда бирламчи бўғинда даволаш лозим бўлган касалликлар бўйича кўрсатиладиган бепул тиббий хизматлар пакетини амалиётга киритсин.
Ишметов, Хожибоев икки ҳафта муддатда бирламчи тиббиёт муассасаларини дори ва тиббиёт воситалари билан қўшимча таъминлашга, жорий йил инвестиция лойиҳаларини оптимизацияси ҳисобидан 165 миллиард сўм ажратсин.
Бунда, вилоят ҳокимлари билан бирга, бир ҳафта муддатда инвестиция лойиҳаларини мақбуллаштириш ҳисобига ҳар бир вилоят кесимида иқтисод қилинадиган маблағларни аниқласин.
Бунинг эвазига, бирламчи тиббиёт муассасаларида аҳоли жон бошига дори-дармон учун ажратилаётган маблағ, 3 бараварга кўпаяди.
Иноятов икки ҳафта муддатда «тиббиёт бригадалари»га бириктирилган 50 мингдан зиёд ҳамшираларни тайёрлаш графигини тасдиқлаб, вилоят, туман ва шаҳар ҳокимлари билан бирга йил якунига қадар тўлиқ ўқитишни ташкил қилсин.
Бунда, ҳамширалар функцияларини кўпайтириш орқали, оилавий шифокорлар иш юкламасини қисқартириш лозим. Ҳамшира ҳамширалигини қилсин», – деди давлат раҳбари.
Президент Жаҳон соғлиқни сақлаш ташкилоти билан ҳамкорликда оилавий шифокорлар малакасини ошириш дастурларини йўлга қўйиш бўйича масъулларга топшириқ берди.
Бундан аввал Шавкат Мирзиёев 20 та туманнинг тиббиёт бирлашмалари фаолиятини ва олис ҳудудларга шифокорларни жалб қилиш ишлари суст олиб борилаётганини кескин танқид қилгани ҳамда Андижон, Хоразм ва Тошкент вилоятлари аҳолиси тиббиётдаги ишлар аҳволидан норози экани ҳақида хабар берилганди.
Изоҳ (0)