Tibbiyot sohasini raqamlashtirish uchun budjetdan ajratilgan 28 milliard so‘m o‘tgan 4 oyda hali o‘zlashtirilmagan. Bu haqda ayni paytda Prezident Shavkat Mirziyoyev raisligida o‘tkazilayotgan yig‘ilishda davlat rahbari qayd etdi, deya xabar bermoqda “Daryo” muxbiri.
“Tibbiyotni raqamlashtirish va xususiy sheriklik bo‘yicha barcha vakolatlar va mas’uliyat sog‘liqni saqlash vaziri o‘rinbosari Abdulla Azizovga o‘tkaziladi.
Tibbiyot muassasalariga ayni paytda 50 mingta kompyuter yetishmaydi. Misol uchun, Jomboyda 12 ta oilaviy poliklinika va shifokorlik punktidan 11 tasida kompyuter ham, internet ham yo‘q.
Shu bilan birga, sohani raqamlashtirish uchun budjetdan ajratilgan 28 milliard so‘m o‘tgan 4 oyda hali o‘zlashtirilmagan.
Endi viloyat tibbiyot boshqarmalarida raqamlashtirish va davlat-xususiy sheriklik bo‘yicha o‘rinbosar lavozimi tashkil etiladi va ular sog‘liqni saqlash vazirining o‘rinbosari Abdulla Azizovga bevosita bo‘ysunadi. Shuningdek, barcha tibbiyot muassasalarida elektron tizim bilan ishlaydigan 2 mingta IT-operator-hamshira lavozimi joriy etiladi.
Ikki hafta muddatda tibbiyot xodimlari uchun kompyuter savodxonligi bo‘yicha IT-markazlarda bepul o‘quv mashg‘ulotlari tashkil etiladi.
Azizov yil yakuniga qadar aholining salomatligi to‘g‘risidagi hamda tibbiy jihozlar ma’lumotlar bazalarini to‘liq yo‘lga qo‘yadi. 2021-yil 1-avgustga qadar elektron order tizimini ishga tushirib, barcha hududlar va ixtisoslashgan markazlarni ulanishini ta’minlasin”, – dedi Prezident.
Davlat rahbari Abdulla Azizov (sog‘liqni saqlash vaziri o‘rinbosari) va G‘ofurjon Mirzayevga (Sirdaryo viloyati hokimi) uch oy muddatda Guliston shahridagi 1 ta oilaviy poliklinikani xususiy sheriklikka berish bo‘yicha tajribani boshlashi kerakligini aytib, qat’iy topshiriq berdi.
“Abdulla Azizov Sirdaryo viloyati hokimi Mirzayev bilan birga, 1-avgustga qadar Sirdaryo viloyatida, Alimov va Xotam Shokirov bilan birga, 1-noyabrga qadar Toshkent shahrida barcha poliklinikalarni to‘liq raqamlashtirsin.
Azizov viloyat hokimlari bilan birga, yil yakuniga qadar yangi 11 ta xususiy sheriklik bitimlarini imzolasin va 6 ta boshlangan loyihani ishga tushirsin.
Ushbu vazifalarni amalga oshirish uchun Abdulla Azizov raqamlashtirish sohasida tender o‘tkazish, shartnoma imzolash, IT bo‘yicha rahbarlarni tanlash va tayinlash, xususiy sheriklik hamda xalqaro moliya tashkilotlari bilan ishlash masalalari bo‘yicha o‘zi mustaqil qaror qabul qiladi. Bunda, xaridlar natijasida iqtisod qilinadigan budjet mablag‘larini ushbu yo‘nalishdagi yangi loyihalarga yo‘naltiradi”, – dedi Shavkat Mirziyoyev.
Bundan avval Shavkat Mirziyoyev olis hududlarga shifokorlarni jalb qilish ishlari sust olib borilayotganini keskin tanqid qilgani, Shavkat Mirziyoyev 20 ta tumanning tibbiyot birlashmalari faoliyatini tanqid qilgani hamda Shavkat Mirziyoyev tibbiyot tizimida 5 ta yo‘nalishda jiddiy o‘zgarishlar qilinishini aytgani haqida xabar berilgandi.
Izoh (0)