Bugungi kunda O‘zbekistondagi olis va chekka hududlarda 143 ta shifokor lavozimi vakant. Bu haqda ayni paytda Prezident Shavkat Mirziyoyev raisligida o‘tkazilayotgan yig‘ilishda davlat rahbari qayd etdi, deya xabar bermoqda “Daryo” muxbiri.
“Yana bir masala – ‘Qishloq shifokori’ dasturi doirasida olis va chekka hududlarga shifokorlarni jalb qilish ishlari sust olib borilmoqda.
Bunday hududlarga atigi 36 nafar shifokor ishga qabul qilingan. Jizzaxda birorta shifokor bilan shartnoma tuzilmagan. Olis va chekka hududlarda 143 ta shifokor lavozimi vakant, Sirdaryoda 34 ta, Surxondaryo 27 ta va Farg‘onada 20 ta.
Bundan tashqari, ishga qabul qilingan tibbiyot xodimlariga 30 million so‘mlik bir martalik to‘lovni amalga oshirish ham endi boshlanmoqda — Navoiyda (6 nafar) va Farg‘ona (4 nafar).
A.Inoyatov tuman va shahar hokimlari bilan birga, 10 ta tibbiyot oliygohi rektorlari bilan birga, ikki hafta muddatda kamida 200 nafar bitiruvchini olis va chekka hududlarga ishga yuborish bo‘yicha kontraktlarni imzolasin.
Umuman, A.Inoyatov oilaviy shifokor punkti va poliklinikalarda shtatlar normativi, shifokorlar va o‘rta tibbiyot xodimlariga malaka talablari, jihozlash standartlarini bundan buyon o‘zi tasdiqlaydi.
Birlamchi bo‘g‘in uchun jihozlar, dori va tibbiyot vositalari sotib olish tender komissiyasiga o‘zi rahbarlik qiladi. Oilaviy shifokor punkti va poliklinikalar rahbarlari faoliyatini baholash, ularni lavozimga qo‘yish va ozod etish masalasiga ham o‘zi javob beradi”, – dedi davlat rahbari.
Bundan avval Shavkat Mirziyoyev tibbiyot tizimida 5 ta yo‘nalishda jiddiy o‘zgarishlar qilinishini aytgani, Andijon, Xorazm va Toshkent viloyatlari aholisi tibbiyotdagi ishlar ahvolidan norozi ekani hamda Shavkat Mirziyoyev 20 ta tumanning tibbiyot birlashmalari faoliyati tanqid qilgani haqida xabar berilgandi.
Izoh (0)