O‘zbekistonning barcha hududlarida o‘tkazilgan so‘rovlarda bor-yo‘g‘i 13 foiz aholi tibbiyotda ijobiy o‘zgarishlarni sezayotganini bildirgan. Bu haqda ayni paytda Prezident Shavkat Mirziyoyev raisligida o‘tkazilayotgan yig‘ilishda davlat rahbari qayd etdi, deya xabar bermoqda “Daryo” muxbiri.
“Ayniqsa, Andijon, Xorazm va Toshkent viloyatlarida yashovchi aholi bu sohadagi ishlar ahvolidan norozi.
So‘nggi bir yil ichida tibbiy xizmat sifatini oshirishga qaratilgan 20 dan ortiq farmon va qarorlar qabul qilinib, barcha masalalar hal qilib berildi.
2021-yilda budjetdan 21 trillion so‘m ajratildi. Bu 2017-yilga nisbatan 3 baravar ko‘p. Lekin vazir o‘rinbosarlarining mas’ul uchastkasi masalani hal qilishda vakolati bo‘lmasa, fidoyi bo‘lib, pastga tushib, bevosita mahallada ishni tashkil qilmasa, islohotlar aholigacha yetib borishi qiyin.
Shu bois bugundan boshlab barcha vazir o‘rinbosarlari o‘z yo‘nalishlari bo‘yicha islohotlar natijadorligiga mas’uliyatni to‘liq olgan holda, shaxsan javob beradi. Shuning uchun bugun vazir va uning o‘rinbosarlari muammolarni yechish va hal qilish bo‘yicha o‘z taklif va rejalarini aytishi kerak”, – dedi Prezident.
Bundan avval Shavkat Mirziyoyev tibbiyot tizimida 5 ta yo‘nalishda jiddiy o‘zgarishlar qilinishini aytgandi.
Izoh (0)