Shavkat Mirziyoyev 20 ta tumanning tibbiyot birlashmalari faoliyatini tanqid qildi

Tuman va shahar hokimlari qo‘shimcha mablag‘ ajratib, o‘z hududidagi oilaviy shifokor punkti va poliklinikalarda sharoitni yaxshilasa, malakali shifokorlarni ko‘paytirsa, aholining 70 foiz muammolari joyida hal bo‘ladi. Bu haqda ayni paytda Prezident Shavkat Mirziyoyev raisligida o‘tkazilayotgan yig‘ilishda davlat rahbari gapirdi, deya xabar bermoqda “Daryo” muxbiri.

“Sog‘liqni saqlash vaziri birinchi o‘rinbosari Amrillo Inoyatov tuman va shahar hokimlari bilan birga, oilaviy shifokor punkti va poliklinikalarda xizmatlar sifatiga, ularni jihozlashga hamda birlamchi bo‘g‘in tibbiyot xodimlarining bilim va malakasini oshirishga shaxsan mas’ul bo‘ladi.

Tuman va shahar hokimlari bir narsani aniq tushunib olishlari zarur. Agar ular qo‘shimcha mablag‘ ajratib, o‘z hududidagi oilaviy shifokor punkti va poliklinikalarda sharoitni yaxshilasa, malakali shifokorlarni ko‘paytirsa, aholining 70 foiz muammolari joyida hal bo‘ladi.

Misol uchun, Kitob tumanida xatlov natijasiga ko‘ra, bir oy ichida uchinchi va to‘rtinchi guruhga mansub (surunkali kasalligi bo‘lgan) 20 turdan ortiq kasalliklar bo‘yicha 1,5 ming nafar bemorlarga joyida kerakli yordam ko‘rsatilgani bois viloyat va respublika shifoxonalariga murojaat 2 baravarga kamaygan. Karmana va Boyovut tumanlari, Kattaqo‘rg‘on va Chirchiq shaharlarida ham aholi bilan mahallabay tizimda ishlash o‘z samarasini bermoqda.

Aksincha, 20 ta tumanda tibbiyot birlashmalarining ishlari yetarli darajada tashkil etilmagan. Bular – Qorovulbozor, Chiroqchi, Qamashi, Qo‘ng‘irot, Chimboy, Marhamat, Jalaquduq, Zarbdor, Mingbuloq, Pop, Oqdaryo, Sayxunobod, Angor, Pskent, Yuqori Chirchiq, Yozyovon, Uchko‘prik, Yangiariq, Xiva, Sergeli tumanlari. Nega bu tumanlarda o‘zgarishlar sezilmayapti, nega bu tumanlarning tibbiyot birlashmasi rahbarlari yosh, malakali kadrlar emas?”, – dedi Shavkat Mirziyoyev.

Bundan avval Shavkat Mirziyoyev tibbiyot tizimida 5 ta yo‘nalishda jiddiy o‘zgarishlar qilinishini hamda Andijon, Xorazm va Toshkent viloyatlari aholisi tibbiyotdagi ishlar ahvolidan norozi ekanini aytgani haqida xabar berilgandi.