O‘zbekistonning qator hududlarida suv ta’minoti xizmatlari sektorini rivojlantirish va uni institutsional qo‘llab-quvvatlash maqsadida Jahon banki imtiyozli kredit va grantlar ajratdi, deya xabar bermoqda Iqtisodiy taraqqiyot va kambag‘allikni qisqartirish vazirligi.
Qayd etilishicha, 2021-yilning 17-may kuni O‘zbekiston Moliya vazirligida, Markaziy Osiyo mamlakatlari bo‘ylab birinchi ish safari doirasida, 14—18-may kunlari rasmiy tashrif bilan O‘zbekistonda bo‘lgan Jahon bankining Yevropa va Markaziy Osiyo bo‘yicha vitse-prezidenti Anna Byorde bilan uchrashuv bo‘lib o‘tdi.
Uchrashuvda O‘zbekiston moliya vaziri Timur Ishmetov, moliya vazirining birinchi o‘rinbosari Omonullo Nasritdinxo‘jayev, moliya vaziri o‘rinbosarlari Odilbek Isoqov, Jamshid Abruyev va boshqa rasmiylar ishtirok etdi.
Jahon banki delegatsiyasi Jahon banki guruhining (JBG) ijrochi direktori, Jahon bankining ijro etuvchi direktorlar kengashida O‘zbekistonning vakili Katarjina Zaydel-Kurovska, Jahon bankining Markaziy Osiyo bo‘yicha mintaqaviy direktori Liliya Burunchuk, Jahon bankining Ruminiya va Vengriyadagi doimiy vakili, Jahon bankining Markaziy Osiyo bo‘yicha yangi mintaqaviy direktori (2021-yil 1-iyuldan) Tatyana Proskuryakova, shuningdek, Jahon bankining O‘zbekistondagi vakolatxonasi rahbari Marko Mantovanellidan tarkib topdi.
Uchrashuv davomida tomonlar ikki tomonlama hamkorlikning qator masalalarini, jumladan, aholini ijtimoiy himoya qilish tizimini rivojlantirish, shahar va qishloq infratuzilmasi, suv ta’minoti kabi muhim yo‘nalishlarda Jahon bankining moliyaviy ishtirokidagi loyihalarni muhokama qildi.
Shuningdek, tomonlar davlat ishtirokidagi yirik korxonalarni transformatsiya qilish sohasidagi islohotlarning borishi hamda 2020—2025-yillarda O‘zbekiston bank tizimini isloh qilish strategiyasi doirasida davlat ishtirokidagi banklarni isloh qilish jarayoni bo‘yicha tadbirlarni ko‘rib chiqdi.
Byorde xonimning tashrifi doirasida navbatdagi uchrashuv O‘zbekiston Iqtisodiy taraqqiyot va kambag‘allikni qisqartirish vazirligida vazir Jamshid Qo‘chqorov bilan bo‘lib o‘tdi.
Muzokaralarda, shuningdek, moliya vaziri Timur Ishmetov, iqtisodiy taraqqiyot va kambag‘allikni qisqartirish vazirining birinchi o‘rinbosari Ilhom Norqulov, Markaziy bank boshqaruvi raisining birinchi o‘rinbosari Botir Zohidov, moliya vaziri o‘rinbosarlari Ahadbek Haydarov va Odilbek Isoqov ishtirok etdi.
Uchrashuv davomida tomonlar O‘zbekiston hukumati tomonidan turli xil ijtimoiy-iqtisodiy sohalarda, jumladan, davlat ishtirokidagi yirik korxonalarni isloh qilish, kambag‘allikni qisqartirish, tadbirkorlikni rivojlantirish chora-tadbirlari, issiqlik ta’minoti tizimlari modernizatsiyasi, energiya resurslaridan oqilona foydalanish va yer munosabatlarini takomillashtirish bo‘yicha amalga oshirilayotgan islohotlarni muhokama qildi.
Tomonlar 2022—2026-yillarga mo‘ljallangan Jahon bankining O‘zbekiston bilan hukumatning mamlakatni keyingi besh yilga mo‘ljallangan ijtimoiy-iqtisodiy va rivojlanish rejalariga javob beradigan sheriklik dasturi doirasida ustuvor yo‘nalishlarini muhokama qildi.
Byorde xonim COVID-19 pandemiyasi tufayli boshlangan inqirozga qaramasdan, muhim ijtimoiy-iqtisodiy islohotlarni amalga oshirishni davom ettirish uchun O‘zbekiston hukumati tomonidan amalga oshirilayotgan sa’y-harakatlarni olqishladi. U Jahon banki inklyuziv va barqaror bozor iqtisodiyotiga o‘tishga qaratilgan islohotlarni amalga oshirishda mamlakatga moliyaviy va konsultativ yordam ko‘rsatishni davom ettirishini ta’kidladi.
Jahon banki va O‘zbekiston hukumati o‘rtasidagi muzokaralar yakunida “O‘zbekistonda suv ta’minoti xizmatlari sektorini rivojlantirish va uni institutsional qo‘llab-quvvatlash” loyihasi bo‘yicha moliyaviy va grant bitimlari imzolash marosimi bo‘lib o‘tdi. Loyihani amalga oshirish uchun JB tomonidan 239 million AQSh dollari miqdorida imtiyozli kredit, shuningdek, Shveysariya davlat kotibiyatining iqtisodiy masalalar bo‘yicha 7,8 million AQSh dollari miqdoridagi granti ajratiladi.
Loyiha doirasida O‘zbekistonning uchta hududida 500 mingdan ortiq kishi suv ta’minoti va kanalizatsiya xizmatlaridan yanada sifatli foydalana oladi. Qoraqalpog‘istonda Nukus, Taxiatosh va Xo‘jayli shaharlarida kanalizatsiya-tozalash inshootlarini modernizatsiya qilish rejalashtirilgan. Shuningdek, Sirdaryo viloyati va Samarqand viloyatining Kattaqo‘rg‘on shahrida suv ta’minoti va kanalizatsiya tarmoqlari kengaytirilib, rekonstruksiya qilinadi.
Shuningdek, “O‘zbekistonda milliy innovatsion tizimni modernizatsiya qilish” loyihasi bo‘yicha moliyaviy bitimlar imzolandi. Loyihani amalga oshirish uchun JB tomonidan 50 million AQSh dollari miqdorida imtiyozli kredit ajratiladi.
Jahon banki tomonidan qo‘llab-quvvatlangan yangi loyiha hukumatga bozor iqtisodiyoti sharoitida ishlashga qodir bo‘lgan milliy innovatsion tizimni rivojlantirishga yordam beradi. Bu ilmiy va innovatsion mahsulotlar va xizmatlarni ilmiy-tadqiqot hamda tajriba-konstruktorlik ishlanmalari va tijoratlashtirish sohasida davlat, ilmiy-tadqiqot tashkilotlari va xususiy sektor o‘rtasidagi hamkorlikni qo‘llab-quvvatlaydi.
Bundan avval Yaponiya O‘zbekiston elektr energiyasi sohasi va ijtimoiy-iqtisodiy tiklanishiga hissa qo‘shish maqsadida 195 million dollar miqdorida kredit ajratgani, Jahon banki O‘zbekistondagi islohotlarni qo‘llab-quvvatlashga 500 million dollar ajratgani hamda Jahon banki 2021—2022-yillarda O‘zbekiston iqtisodiyoti o‘sishini prognoz qilgani haqida xabar berilgandi.
Izoh (0)