Ўзбекистоннинг қатор ҳудудларида сув таъминоти хизматлари секторини ривожлантириш ва уни институционал қўллаб-қувватлаш мақсадида Жаҳон банки имтиёзли кредит ва грантлар ажратди, дея хабар бермоқда Иқтисодий тараққиёт ва камбағалликни қисқартириш вазирлиги.
Қайд этилишича, 2021 йилнинг 17 май куни Ўзбекистон Молия вазирлигида, Марказий Осиё мамлакатлари бўйлаб биринчи иш сафари доирасида, 14—18 май кунлари расмий ташриф билан Ўзбекистонда бўлган Жаҳон банкининг Европа ва Марказий Осиё бўйича вице-президенти Анна Бёрде билан учрашув бўлиб ўтди.
Учрашувда Ўзбекистон молия вазири Тимур Ишметов, молия вазирининг биринчи ўринбосари Омонулло Насритдинхўжаев, молия вазири ўринбосарлари Одилбек Исоқов, Жамшид Абруев ва бошқа расмийлар иштирок этди.
Жаҳон банки делегацияси Жаҳон банки гуруҳининг (ЖБГ) ижрочи директори, Жаҳон банкининг ижро этувчи директорлар кенгашида Ўзбекистоннинг вакили Катаржина Зайдел-Куровска, Жаҳон банкининг Марказий Осиё бўйича минтақавий директори Лилия Бурунчук, Жаҳон банкининг Руминия ва Венгриядаги доимий вакили, Жаҳон банкининг Марказий Осиё бўйича янги минтақавий директори (2021 йил 1 июлдан) Татяна Проскурякова, шунингдек, Жаҳон банкининг Ўзбекистондаги ваколатхонаси раҳбари Марко Мантованеллидан таркиб топди.
Учрашув давомида томонлар икки томонлама ҳамкорликнинг қатор масалаларини, жумладан, аҳолини ижтимоий ҳимоя қилиш тизимини ривожлантириш, шаҳар ва қишлоқ инфратузилмаси, сув таъминоти каби муҳим йўналишларда Жаҳон банкининг молиявий иштирокидаги лойиҳаларни муҳокама қилди.
Шунингдек, томонлар давлат иштирокидаги йирик корхоналарни трансформация қилиш соҳасидаги ислоҳотларнинг бориши ҳамда 2020—2025 йилларда Ўзбекистон банк тизимини ислоҳ қилиш стратегияси доирасида давлат иштирокидаги банкларни ислоҳ қилиш жараёни бўйича тадбирларни кўриб чиқди.
Бёрде хонимнинг ташрифи доирасида навбатдаги учрашув Ўзбекистон Иқтисодий тараққиёт ва камбағалликни қисқартириш вазирлигида вазир Жамшид Қўчқоров билан бўлиб ўтди.
Музокараларда, шунингдек, молия вазири Тимур Ишметов, иқтисодий тараққиёт ва камбағалликни қисқартириш вазирининг биринчи ўринбосари Илҳом Норқулов, Марказий банк бошқаруви раисининг биринчи ўринбосари Ботир Зоҳидов, молия вазири ўринбосарлари Аҳадбек Ҳайдаров ва Одилбек Исоқов иштирок этди.
Учрашув давомида томонлар Ўзбекистон ҳукумати томонидан турли хил ижтимоий-иқтисодий соҳаларда, жумладан, давлат иштирокидаги йирик корхоналарни ислоҳ қилиш, камбағалликни қисқартириш, тадбиркорликни ривожлантириш чора-тадбирлари, иссиқлик таъминоти тизимлари модернизацияси, энергия ресурсларидан оқилона фойдаланиш ва ер муносабатларини такомиллаштириш бўйича амалга оширилаётган ислоҳотларни муҳокама қилди.
Томонлар 2022—2026 йилларга мўлжалланган Жаҳон банкининг Ўзбекистон билан ҳукуматнинг мамлакатни кейинги беш йилга мўлжалланган ижтимоий-иқтисодий ва ривожланиш режаларига жавоб берадиган шериклик дастури доирасида устувор йўналишларини муҳокама қилди.
Бёрде хоним COVID-19 пандемияси туфайли бошланган инқирозга қарамасдан, муҳим ижтимоий-иқтисодий ислоҳотларни амалга оширишни давом эттириш учун Ўзбекистон ҳукумати томонидан амалга оширилаётган саъй-ҳаракатларни олқишлади. У Жаҳон банки инклюзив ва барқарор бозор иқтисодиётига ўтишга қаратилган ислоҳотларни амалга оширишда мамлакатга молиявий ва консультатив ёрдам кўрсатишни давом эттиришини таъкидлади.
Жаҳон банки ва Ўзбекистон ҳукумати ўртасидаги музокаралар якунида «Ўзбекистонда сув таъминоти хизматлари секторини ривожлантириш ва уни институционал қўллаб-қувватлаш» лойиҳаси бўйича молиявий ва грант битимлари имзолаш маросими бўлиб ўтди. Лойиҳани амалга ошириш учун ЖБ томонидан 239 миллион АҚШ доллари миқдорида имтиёзли кредит, шунингдек, Швейцария давлат котибиятининг иқтисодий масалалар бўйича 7,8 миллион АҚШ доллари миқдоридаги гранти ажратилади.
Лойиҳа доирасида Ўзбекистоннинг учта ҳудудида 500 мингдан ортиқ киши сув таъминоти ва канализация хизматларидан янада сифатли фойдалана олади. Қорақалпоғистонда Нукус, Тахиатош ва Хўжайли шаҳарларида канализация-тозалаш иншоотларини модернизация қилиш режалаштирилган. Шунингдек, Сирдарё вилояти ва Самарқанд вилоятининг Каттақўрғон шаҳрида сув таъминоти ва канализация тармоқлари кенгайтирилиб, реконструкция қилинади.
Шунингдек, «Ўзбекистонда миллий инновацион тизимни модернизация қилиш» лойиҳаси бўйича молиявий битимлар имзоланди. Лойиҳани амалга ошириш учун ЖБ томонидан 50 миллион АҚШ доллари миқдорида имтиёзли кредит ажратилади.
Жаҳон банки томонидан қўллаб-қувватланган янги лойиҳа ҳукуматга бозор иқтисодиёти шароитида ишлашга қодир бўлган миллий инновацион тизимни ривожлантиришга ёрдам беради. Бу илмий ва инновацион маҳсулотлар ва хизматларни илмий-тадқиқот ҳамда тажриба-конструкторлик ишланмалари ва тижоратлаштириш соҳасида давлат, илмий-тадқиқот ташкилотлари ва хусусий сектор ўртасидаги ҳамкорликни қўллаб-қувватлайди.
Бундан аввал Япония Ўзбекистон электр энергияси соҳаси ва ижтимоий-иқтисодий тикланишига ҳисса қўшиш мақсадида 195 миллион доллар миқдорида кредит ажратгани, Жаҳон банки Ўзбекистондаги ислоҳотларни қўллаб-қувватлашга 500 миллион доллар ажратгани ҳамда Жаҳон банки 2021—2022 йилларда Ўзбекистон иқтисодиёти ўсишини прогноз қилгани ҳақида хабар берилганди.
Изоҳ (0)