Armaniston hududiga Ozarbayjon harbiylari kiritilgandan keyin vujudga kelgan vaziyat natijalari bo‘yicha ikki davlat qurolli kuchlari vakillari o‘rtasidagi muzokaralar 19-may kuni davom ettiriladi. Bu haqda Armaniston bosh vaziri vazifasini bajaruvchi Nikol Pashinyanga tayanib, “Interfaks” xabar berdi.
“Kecha oqshomgacha olib borilgan muzokaralar chorshanba kuni davom ettiriladi. Muzokaralarning eng asosiy mavzusi — Armaniston hududidan Ozarbayjon qurolli kuchlarini olib chiqish. Bu amalga oshguniga qadar biz vaziyatga Armanistonning suvereniteti, barqarorligi, hududiy yaxlitligiga tahdid soluvchi inqiroz deb qaraymiz”, — dedi Pashinyan mamlakat xavfsizlik kengashining yig‘ilishida.
Uning so‘zlariga ko‘ra, bu holat Kollektiv xavfsizlik shartnomasi tashkiloti (KXShT) xartiyasida, Kollektiv xavfsizlik shartnomasi to‘g‘risidagi bitimda, KXShT inqirozli vaziyatlarga javob berish to‘g‘risidagi xartiyada ifodalangan.
“Biz tomonimizdan qo‘yilgan qonuniy talab hal qilinmaguncha ushbu mexanizmlar va ularga parallel ravishda arman-rus ittifoqi mexanizmlaridan foydalanish zarur. Ular o‘zi shunday vaziyatlar uchun ishlab chiqilgan”, — dedi Pashinyan.
Shuningdek, Pashinyan mavjud vaziyatni siyosiy jihatdan hal qilib bo‘lmasa, “u holda harbiy-siyosiy mexanizmlarni qo‘llash kerakligini” qayd etgan.
U KXShT shartnomasi va Armaniston–Rossiya kelishuvlarida tegishli “funksiyalar ko‘zda tutilgani” va “ushbu shartnomalar aynan shunday holatlar uchun taqdim etilganini” ham aytib o‘tgan.
“Biz qonuniy huquqimizdan foydalanib, ushbu funksiyalarni ishga tushirdik”, — degan Pashinyan.
Avvalroq Armaniston–Ozarbayjon chegarasidagi vaziyat tufayli Armaniston KXShTga murojaat qilgani haqida xabar berilgan. Pashinyan Rossiya prezidentidan harbiy yordam ham so‘ragan edi.
Eslatib o‘tamiz, Armanistonning Syunik viloyati Goris shahri ma’murlari 2021-yil 12-may kuni Ozarbayjon harbiylari tomonidan respublikaning davlat chegarasi buzilgani haqida xabar berdi. Pashinyan hodisani mamlakat suverenitetiga tajovuz deb atadi. Armaniston Bosh prokuraturasi 13-may kuni mazkur hodisa yuzasidan jinoiy ish qo‘zg‘atdi.
16-may kuni Ozarbayjon Tashqi ishlar vazirligi matbuot kotibi Armaniston suverenitetini buzish haqidagi ayblovlarni asossiz deb atadi. Uning so‘zlariga ko‘ra, so‘nggi oylarda tomonlar o‘rtasida chegara masalalarida ziddiyatlar yuzaga kelgan va ularning barchasi muzokaralar yo‘li bilan tartibga solingan edi. Ozarbayjonning fikricha, Armanistonning provokatsion bayonotlari ushbu mamlakatdagi saylovoldi vaziyat bilan bog‘liq, deya qo‘shimcha qilgan TIV vakili.
16-mayda Ozarbayjon Armaniston bilan chegaradagi keskinlik fonida harbiy mashg‘ulotlar o‘tkazishni ham boshlagan.
Izoh (0)