So‘nggi o‘n yil ichida AQSh minglab harbiylardan iborat maxfiy armiya tuzgan, uning a’zolari mamlakat ichida ham, xorijda ham Pentagonning turli topshiriqlarini bajarmoqda. Bu haqda Newsweek gazetasi ikki yillik jurnalistik tekshiruvdan so‘ng ma’lum qildi.
Nashrning yozishicha umumiy hisobda maxfiy tarmoq kamida 60 ming kishini o‘z ichiga oladi, bunday agentlarning haqiqiy soni yanada ko‘proq bo‘lishi ham mumkin. Tarmoqqa 130 ga yaqin xususiy tashkilot, shuningdek o‘nlab unchalik taniqli bo‘lmagan va maxfiy federal tashkilotlar kiradi.
Newsweek hisob-kitoblariga ko‘ra, maxfiy armiya uchun har yili 900 million dollardan ko‘proq mablag‘ sarflanadi. Ushbu mablag‘lar taxminiy nomlar ostida ishlaydigan agentlar uchun soxta hujjatlar tayyorlash, ularning nomidan hisob-kitoblar va soliqlarni to‘lash hamda maxsus kuzatuv moslamalari, niqoblash vositalarini yaratish uchun ishlatiladi.
Maxfiy tarmoq xodimlarining qariyb yarmi maxsus operatsiya kuchlari agentlaridir. Ularning ayrimlari Pokiston va G‘arbiy Afrika kabi hududlarda terrorchilarni kuzatadi, ammo ulardan ko‘pincha Eron va Shimoliy Koreya singari AQShga do‘st bo‘lmagan mamlakatlardagi topshiriqlarni bajarish uchun foydalaniladi.
Gazeta ma’lumotlariga ko‘ra maxfiy armiya tarkibiga turli mamlakatlarda yashirin faoliyat olib boradigan harbiy razvedka mutaxassislari ham kiradi. Bundan tashqari, internetda mavjud minglab kiberxavfsizlik va razvedka mutaxassislari maxfiy tarmoq doirasida ishlaydi. Ushbu bo‘lim a’zolari, boshqa masalalar qatori Pentagonning maxfiy missiyalarida qatnashadigan barcha odamlar va tashkilotlar to‘g‘risidagi axborotlarni yashirishga yordam berib butun tarmoq faoliyati xavfsizligini ta’minlash bilan shug‘ullanadi.
Newsweek Pentagonga xizmat qiladigan ayg‘oqchilar Vashington rasman shu kabi jinoiy operatsiyalarni amalga oshirishda doimiy ayblaydigan Rossiya va Xitoy agentlaridan kam emasligi va ular bilan deyarli bir xil harakat olib borishini qayd etgan.
Izoh (0)