Rossiya prezidenti Vladimir Putin Qozon shahrining 175-sonli maktabida yuz bergan otishma paytida bolalarni qutqargan maktab o‘qituvchilari va xodimlariga davlat mukofotlari topshirish to‘g‘risida ko‘rsatma berdi, deb yozadi Meduza.
Xabarga ko‘ra, hukumat a’zolari bilan uchrashuvda so‘zga chiqqan prezident Qozondagi qirg‘inni “dahshatli ofat” va “vahshiy jinoyat” deb atadi.
“Fojia, albatta, barchamizni hayratda qoldirdi. Og‘ir kunlarda butun Rossiya Qozon aholisi bilan, Tatariston bilan birga bo‘ldi va shunday bo‘lib qolmoqda. Mamlakatning barcha mintaqalari aholisi dildan qo‘llab-quvvatlash va hamdardlik so‘zlarini aytishga, Qozon fuqarolarining dardini o‘z dardidek qabul qilishga intilmoqda. Men yana bir bor qurbonlarning oilalariga, eng qadrli boyligi — farzandi, nabirasi, yaqinlari va qarindoshlarini yo‘qotgan mazkur oilalarga chuqur hamdardlik bildiraman”, — dedi Putin.
Prezident, shuningdek, fuqarolik qurollari egalariga qo‘yiladigan talablarni kuchaytirish, ularning muomalasi ustidan nazoratni oshirish va qurol olish uchun tibbiy ma’lumotnomalarni sotib olish imkoniyatini istisno qilish to‘g‘risida ko‘rsatma berdi.
Eslatib o‘tamiz, 11-may kuni 19 yoshli Ilnaz Galyaviyev o‘zi ilgari o‘qigan Qozon shahridagi 175-sonli gimnaziyaga kelib, o‘quvchilar va o‘qituvchilarga o‘q uzishni boshladi. To‘qqiz kishi jumladan yetti nafar maktab o‘quvchisi vafot etdi, yana 23 kishi, asosan bolalar, jarohat oldi.
Hujum qilgan shaxs hibsga olindi. Qo‘lga olinganidan keyin, birinchi so‘roq paytida Galyaviyev 2020-yil yozida o‘zida “maxluq uyg‘onishni boshlagani” va “hammadan yanada ko‘proq nafratlanishni” boshlaganini aytdi. Ikki oy avval esa Galyaviyev, o‘zining so‘zlariga ko‘ra, o‘zining “xudo” ekanini anglab yetgan va hatto bu haqda o‘z onasiga ham so‘zlab bergan.
Tekshiruv natijalariga ko‘ra Galyaviyevga 2020-yilda bosh miya kasalligi tashxisi qo‘yilgan.
Shuningdek, 12-may kuni Qrimning Qizil gvardiya tumanida ijtimoiy tarmoqlarda mahalliy litseyni portlatish tahdidi bilan post qoldirgan erkak hibsga olindi. Qrim huquq-tartibot organlarining ma’lumotlariga ko‘ra, qonunbuzar shu yo‘l bilan maxsus xizmatlarning faoliyatini tekshirib ko‘rmoqchi bo‘lgan.
13-may kuni Rossiyaning yana bir shahrida maktabni portlatish bilan tahdid qilgan o‘smir hibsga olindi. Qozon shahridagi maktabga qilingan hujumga oid video ostidagi izohlarda “Xudo sizga hakam” niki ostida xabar qoldirgan o‘smir “Ertaga Blagoveshensk shahrining 27-maktabida men ham shunday qilaman” deb yozgan. Zudlik bilan hibsga olingan o‘smir tergovchilarga “shunchaki hazillashganini” aytgan.
Izoh (0)