АҚШнинг Colonial Pipeline қувур линияси киберҳужумдан сўнг фаолиятини қайта тиклади. Компания хакерларга 5 млн доллар тўлагани айтилмоқда

АҚШнинг Colonial Pipeline қувур линияси компанияси 7 май кунги хакерлар ҳужумидан сўнг ўз фаолиятини қайта тиклади. Бу ҳақда компания Twitter’ига таяниб, Meduza хабар берди.

https://twitter.com/Colpipe/status/1392943295836340231

Colonial Pipeline бутун қувур тизимини қайта ишга туширгани ва ўзи хизмат кўрсатадиган барча бозорларга маҳсулот етказиб беришни бошлагани ҳақида маълум қилади», — дейилади компания хабарида.

Bloomberg ва The New York Times газеталарининг ёзишича, компания қувур тизимини қайта тиклаш учун пул талаб қилган киберҳужумчиларга тахминан 75 биткоин ёки 5 миллион доллар тўлаган.

Федерал қидирув бюроси (ФҚБ) маълумотларига кўра, Colonial Pipeline’га қилинган ҳужум ортида DarkSide хакерлик гуруҳи турибди, унинг базаси Шарқий Европада бўлиб, асли россиялик хакерлардан иборат. Улар компаниянинг компьютер тизимига зарарли дастурни киритган, натижада қувур фаолияти бир ҳафта давомида тўхтаб қолди. АҚШ президентининг сўзларига кўра, ушбу ҳужумга Россия ҳукуматининг алоқаси бўлмаслиги мумкин.

Colonial Pipeline қувур линиясининг узунлиги 8800 километрдан ошади. АҚШ Шарқий соҳилига етказиладиган бензин, дизель ёқилғиси ва бошқа нефть маҳсулотларининг 45 фоизи шу қувур орқали ўтади. Компанияга уюштирилган киберҳужум АҚШнинг бир қатор штатларида бензинга талаб ортишига сабаб бўлди.