Buyuk Britaniyada ro‘yxatdan o‘tgan Turkmanistonning Greatcom Trade LLP kompaniyasi 2016-yil noyabr oyida chet eldan oziq-ovqat mahsulotlarini sotib olish uchun 25,7 million dollarlik hukumat shartnomasini qo‘lga kiritdi. Ma’lum bo‘lishicha, firma Turkmaniston prezidentining jiyani Hojimurod Rejepovga tegishli bo‘lib, pul olganidan ko‘p o‘tmay u o‘zi uchun uch qavatli uy qurdirgan. Bu haqda “Gundogar” va Turkmen News veb-sayti jurnalistlariga tayanib, “Xronika Turkmenistana” xabar berdi.
Davlatdan ajratilgan mablag‘ evaziga pudratchi Turkmanistonga 15 100 tonna shakar, 7000 tonna tovuq go‘shti, 2083 tonna kungaboqar yog‘i, 170 tonna sariyog‘ va 107 tonna margarin sotib olib, Turkmanistonga yetkazib berishi kerak edi.
Jurnalistlarning xabariga ko‘ra, oziq-ovqat mahsulotlarini yetkazib berish bo‘yicha 7,8 million dollarlik yana bir shartnoma Rejepovning uzoq yillik biznes sherigi Mardon Qurbonovga tegishli Staunchest Holdings LP kompaniyasiga berilgan.
2020-yil sentabr oyida Turkmaniston Savdo vazirligi Shotlandiyada ro‘yxatdan o‘tgan Intergold LP kompaniyasiga 1,6 million dollar yuborgani ham ma’lum bo‘ldi. Pul o‘tkazmasining maqsadi sifatida “shirinliklar” sotib olish ko‘rsatilgan. Shu bilan birga, xabarda bitimning umumiy summasi 3,5 million dollarni tashkil etgani aytilmoqda.
2017-yilda Rejepov sobiq Gaja xususiy qurilish maydoni o‘rnida qurilgan uch qavatli hashamatli uylardan biriga ega bo‘ldi. Jurnalistlar uyning interyer dizayneri tomonidan YouTube’ga joylangan videoni tomosha qilib, shunday xulosaga keldi. Ayni paytda video o‘chirib yuborilgan.
Surishtiruv a’zolari uyning boy bezaklari orasida bolalar xonasida uy egasining o‘g‘liga tegishli karavotga yozilgan B.H. bosh harflarini uchratdi. Bu Rejepovning o‘g‘li Begench Hojimurodovga tegishli, deya taxmin qilinmoqda. “Uning familiyasi Turkmanistonda odatiy bo‘lgani kabi otasining ismidan olingan. Begench hattoki uyning fotosuratini Instagram’ga joylashtirgan”, — deyiladi xabarda.
Izoh (0)