Moskvadagi AQSh elchixonasi matbuot kotibi Rebekka Ross Rossiyadan chiqarib yuborilmoqda. Bu haqda Meduza xabar berdi.
Nashrning ta’kidlashicha, Ross Moskvadan chiqarib yuborilayotgan 10 nafar amerikalik diplomat ro‘yxatida bor. Diplomatlarni chiqarib yuborish haqida 21-aprel kuni e’lon qilingan edi. Ularga Rossiyani tark etishi uchun bir oy vaqt berilgan.
Rossiya Tashqi ishlar vazirligining ma’lum qilishicha, Rossni chiqarib yuborish Rossiyaning olti oydan ko‘proq vaqt davomida Vashingtondagi elchixonasiga matbuot kotibi tayinlashiga to‘sqinlik qilayotgan AQSh xatti-harakatlariga javobdir.
“Biz diplomatik vakolatxonamizning matbuot kotibi etib tayinlagan shaxs biror sabab bilan izohlanmasdan Vashingtonga kiritilmayapti. U ilgari Rossiyaning boshqa ikkita elchixonalarida shu lavozimda ishlagan katta tajribaga ega diplomat. AQSh ushbu shaxs tomonidan viza uchun taqdim etilgan hujjatlarni shunchaki qaytarib berdi, hatto ularning rad etish sabablarini izohlamadi. Demak, matbuot kotibini chiqarib yuborish Rossiyaning tashabbusi emas”, — dedi TIV.
Rossning o‘zi mamlakatdan chiqarib yuborilayotganini tasdiqladi.
Moskva va Vashington o‘rtasidagi munosabatlarning keskinlashuvi so‘nggi marta 15-aprel kuni, Amerika prezidenti Jo Bayden Rossiyaga nisbatan yangi sanksiyalar kiritganidan keyin yuz berdi. Yangi sanksiyalar Rossiyaning AQShdagi 2020-yilgi prezidentlik saylovlariga aralashishi, AQSh hukumat idoralariga qilingan kiberhujum va Rossiyaning Afg‘onistondagi amerikaliklarga qarshi “Tolibon” jangarilari bilan til biriktirgani bilan bog‘liq.
Shuningdek, AQSh mamlakatdan 10 nafar rossiyalik diplomat chiqarib yuborilishi haqida e’lon qildi. Bunga javoban Moskva ham 10 nafar amerikalik diplomatni mamlakatdan chiqarib yuborish to‘g‘risida o‘zaro qaror qabul qilganini e’lon qildi.
Diplomatlarni chiqarib yuborish bilan bir qatorda, Rossiya AQSh diplomatik vakolatxonalariga Rossiya va uchinchi mamlakatlar fuqarolarini ma’muriy va texnik ishchilar sifatida yollashni taqiqladi. AQSh elchisi Jon Sallivandan “vaziyatni tahlil qilish va maslahatlashuvlar o‘tkazish uchun” o‘z poytaxtiga qaytishni so‘radi. Avvaliga Sallivan Kremlning tavsiyalariga qaramay, mamlakatni tark etishdan bosh tortgan. Keyinroq u Vashingtonga qaytib ketdi.
Izoh (0)