Moskva jome masjidi, Eski masjid va Memorial masjid COVID-19 pandemiyasi tufayli Ramazon hayiti kuni namozxonlarni qabul qilmaydi. Bu haqda Rossiya musulmonlari diniy idorasi matbuot xizmati xabar berdi.
“Bayram namozi faqat har uchala masjid imomlari va Musulmonlar diniy idorasi xodimlari ishtirokida o‘tkaziladi hamda onlayn translyatsiya qilinadi”, — deyiladi xabarda.
Idora veb-saytida xabar qilinishicha, tashkilot 100 ming kishidan oshmagan holda ommaviy tadbir o‘tkazish to‘g‘risida so‘rov yuborgan, ammo bunga javoban Moskva hukumatidan shaharda ommaviy yig‘inlarni taqiqlash davom etayotgani haqida xat kelgan. Moskvadagi Mintaqaviy xavfsizlik va korrupsiyaga qarshi kurash departamenti agar taqiq buzilgan taqdirda, bayram tashkilotchilari va ishtirokchilari javobgarlikka tortilishi mumkinligini qayd etib o‘tgan.
Musulmonlar idorasida an’anaviy tarzda o‘tkaziladigan ibodatlarni bekor qilish to‘g‘risidagi qaror mushkul, ammo oqilona deb ataldi. “Rossiya Musulmonlar idorasi barcha dindorlarni bayram kuni o‘z uyida bo‘lishga va oila a’zolari davrasida bayram qilishga chaqiradi”, — deya ta’kidladi tashkilot.
Moskva jome masjididan muftiy shayx Ravil G‘aynutdinning bayram xutbasi 13-may kuni soat 07:00 da (Toshkent vaqti bilan 09:00) idoraning YouTube-kanalida, soat 09:00 da (Toshkent vaqti bilan 11:00) esa “Rossiya 1” telekanalida namoyish etiladi.
Masjid bosh imomi Ildar Alyautdinovning aytishicha, dindorlar rasmiylarning qarorini to‘g‘ri tushunadi. “Ushbu taqiq nafaqat bizga, balki pravoslavlarga ham tegishli bo‘lgan. Pasxada odamlardan ommaviy yig‘inlardan tiyilish so‘ralgan edi”, — dedi imom.
2020-yili ham Rossiya prezidenti Vladimir Putin va musulmonlar rahbarlari dindorlardan koronavirus pandemiyasi sababli Ramazon hayitini uyda nishonlashni so‘ragan edi.
Izoh (0)