Amerikaning Rossiyadagi elchisi Jon Sallivan Kremlning maslahatlashuvlar uchun Vashingtonga jo‘nab ketish haqidagi tavsiyalariga qaramay, mamlakatni tark etishdan bosh tortmoqda, deb yozadi “RBK”.
Axios portal vaziyatdan xabardor manbalariga tayanib ma’lum qilishicha, Sallivan agar Rossiya prezidenti Vladimir Putin uning ketishini xohlasa, uni majbur qilishiga to‘g‘ri kelishini aytgan.
AQSh Davlat departamenti bu axborotni izohlashdan bosh tortgan. Ammo keyinroq Axios nashri Davlat departamenti vakiliga tayanib, AQShning Rossiyadagi elchisi Jon Sallivan shu hafta Vashingtonga jo‘nab ketib, u yerda bir necha hafta turishi, so‘ng esa yana qaytib kelishini ma’lum qildi.
“Shu hafta elchi Sallivan o‘z oilasi bilan ko‘rishish va yangi ma’muriyat a’zolari bilan uchrashish uchun AQShga qaytib boradi, ular bilan hali maslahatlashish imkoniyatiga ega bo‘lmagan edi”, — degan Davlat departamenti vakili.
Moskva va Vashington o‘rtasidagi munosabatlarning keskinlashuvi so‘nggi marta 15-aprel kuni, Amerika prezidenti Jo Bayden Rossiyaga nisbatan yangi sanksiyalar kiritganidan keyin yuz berdi. Yangi sanksiyalar Rossiyaning AQShdagi 2020-yilgi prezidentlik saylovlariga aralashishi, AQSh hukumat idoralariga qilingan kiberhujum va Rossiyaning Afg‘onistondagi amerikaliklarga qarshi “Tolibon” jangarilari bilan til biriktirgani bilan bog‘liq. Oq uy fevral oyida Rossiyaning ushbu harakatlari uchun AQSh rasmiylari unga qarshi sanksiyalar rejalashtirayotganini aytgandi.
Shuningdek, AQSh mamlakatdan 10 nafar rossiyalik diplomatlar chiqarib yuborilishi haqida e’lon qildi. Polsha AQShning Rossiyaga qarshi sanksiyalarini qo‘llab-quvvatladi. Polsha Varshavadagi uch nafar rossiyalik diplomatni persona non grata deb e’lon qildi, ular mamlakatdan chiqarib yuboriladi. Rossiya Tashqi ishlar vazirligi bunga xuddi shu tarzda javob qilishini ma’lum qildi.
Ushbu voqealar ortidan Sallivan Rossiya TIVga “og‘ir muloqot” uchun bordi, u yerda prezident yordamchisi Yuriy Ushakov unga maslahatlashuvlar uchun Vashingtonga qaytib ketishni tavsiya qildi. Bundan tashqari, Ushakov Sallivanga Moskvaning AQSh yangi sanksiyalariga javob choralarini bayon qildi.
Mavzuga doir:
- AQSh Rossiyaga qarshi yangi sanksiyalar joriy qildi
- “Agar Rossiya demokratiyamiz yo‘lida g‘ov bo‘laversa, bundan keyingi choralarni ko‘rishga ham tayyorman” — Jo Bayden Rossiyaga qarshi sanksiyalar haqida
- Polsha, Britaniya va NATO AQShning Rossiyaga qarshi sanksiyalarini qo‘llab-quvvatladi. Bayden va Putinning uchrashuvi kuchda qolishi ma’lum qilindi
Izoh (0)