Dunyoda COVID-19’ga chalinganlar soni 159 707 593 kishini tashkil qilmoqda. Jons Hopkins universiteti ma’lumotlari shundan darak berdi. Kasallanganlar soni bo‘yicha yuqori beshlikda, doimgidek, AQSh (32,7 million), Hindiston (23,3 million), Braziliya (15,2 million), Fransiya (5,8 million) va Turkiya (5 million) joylashib turibdi. Dunyo bo‘yicha koronavirus oqibatidagi o‘limlar soni esa 3 318 264 kishiga yetdi.
Hindiston kunlik COVID o‘limlar soni bo‘yicha yangi rekord o‘rnatdi
Hindistonda bir kecha-kunduzda koronavirusdan vafot etganlar soni bo‘yicha yangi rekord o‘rnatildi. Bu haqda hukumat saytida e’lon qilingan ma’lumotlar guvohlik bermoqda.Ularga ko‘ra, 11-maygacha bo‘lgan bir kecha-kunduzda mamlakatda 4205 kishi vafot etgan. Bungacha, Jahon sog‘liqni saqlash tashkiloti (JSST) ma’lumotlari bo‘yicha, sutkalik o‘limlarning maksimal soni 8-may kuni qayd etilgandi — 4187 ta.
Hindistonda koronavirus bilan kasallanish holatlarining keskin o‘sishi 1-apreldan boshlandi. Xususan, 31-mart kuni mamlakatda 53 480 kishi virusni yuqtirib olgan bo‘lsa, ertasi kuniyoq bu raqam 72 330 kishigacha ortdi va o‘shandan buyon muntazam o‘sib bormoqda.
Aprel o‘rtalarida Hindistonda COVID-19 oqibatidagi o‘limlarning keskin o‘sishi boshlandi. 15-aprel kuni mamlakatda 1038 kishi vafot etgan bo‘lsa, 21-aprelga kelib, kunlik o‘limlar soni 2 mingtadan oshdi.
Braziliyada koronavirusga qarshi emlangan homilador ayol vafot etdi
Braziliyaning San-Paulu va Rio-de-Janeyro shtatlari homiladorlardan biri AstraZeneca vaksinasi bilan emlanganidan keyin vafot etgach, homilador ayollarni emlashni to‘xtatib qo‘ydi. Bu Braziliya Sanitariya va gigiyena nazorati agentligi tavsiyasi bilan amalga oshirildi. Hukumat homilador ayolning o‘limini tekshirishda davom etmoqda.AstraZeneca kompaniyasining o‘zi ma’lum qilishicha, koronavirusga qarshi vaksina sinovida homilador va emizikli ayollar qatnashmagan. Hayvonlarda o‘tkazilgan tadqiqotlar dorining homiladorlikka yoki homila rivojlanishiga yomon ta’sir qilishidan darak beruvchi bevosita yoki bilvosita belgilarni aniqlamagan.
Mavzuga doir: Braziliya koronavirusning “ideal laboratoriyasi” deb ataldi. Mamlakatda yangi va xavfliroq shtammlar paydo bo‘lmoqda
Koronavirusning “hindcha” shtammi dunyo uchun xavfli deb tan olindi
JSST Hindistonda tarqalayotgan uch karra mutatsiyali koronavirus shtammini global darajada “xavotir uyg‘otuvchi” deb tan oldi.JSST yangi va zoonoz kasalliklar bo‘yicha bo‘linmasi rahbari aytishicha, Hindistonda paydo bo‘lgan B.1.617 shtammi virusning boshlang‘ich shakliga qaraganda yuqumliroq, halokatliroq va vaksinalarga nisbatan chidamliroqdir.
“Shuning uchun ham biz bu variantni global darajada xavotir uyg‘otadigan deb tasniflaymiz. Hatto ba’zi dastlabki tadqiqotlar shtammning yuqori darajada yuqumliligini ko‘rsatgan bo‘lsa-da, bizga virusning bu variant haqida ko‘proq ma’lumot kerak”, — dedi JSST rasmiy vakili Mariya Van Kerkxove.
Uning qayd etishicha, mutatsiyaga uchragan infeksiya SARS-CoV-2 boshlang‘ich shtammiga nisbatan ancha tezroq tarqalmoqda.
Izoh (0)