Prezident Shavkat Mirziyoyev raisligida 12-may, chorshanba kuni o‘tkazilgan yig‘ilishda davlat rahbari maktablardagi ahvol va muammolar haqida so‘z yuritdi. Bu haqda Aziza Qurbonova o‘z Telegram kanalida ma’lum qildi.
“Meni nima qiynaydi desangiz, aytaman: maktabdagi sharoit. Maktablardagi ahvolni ko‘rsa, odam tavba deb yuboradi. Shu to‘rt yilda maktabga juda ko‘p e’tibor berdik, ammo muammolar hali ham ko‘p. Kamchiliklarni 27 yil ko‘rib, ko‘rmaslikka olganmiz. Surxondaryo, Qashqadaryo, Samarqanddagi maktablarning ahvolini yaxshi bilaman.
Uchinchi Renessansga poydevor quryapmiz, deyapmiz. Agar mablag‘larni to‘g‘ri sarflab, kelajagimiz bo‘lgan maktablarga birinchi navbatda yo‘naltirmasak, kitobini, sharoitini, o‘qituvchining ish haqini joy-joyiga qo‘ymasak, niyatimizga erisha olmaymiz.
Hozirning o‘zida maktabni ta’mirlash, uyoq-buyog‘ini suvash uchun 30 trillion so‘m kerak bo‘lyapti. Bir paytlar partani olib borib qo‘yib, maktab filiallari ochilgan. Bu hozir katta muammoga aylanyapti: bunday maktablar filiallarida o‘qigan bolalarning bilimi, o‘qituvchilarning saviyasi, oyligi, sharoiti qanday bo‘ladi? Bunga javob yo‘q. Bu faqat maktab ta’limining o‘zidagi muammolar.
Shermatovni oldimga chaqirsam, sharoitni yaxshilash uchun 30 trillion so‘m mablag‘ kerak, deyapti. Bu kitob-u partasini hisobga olinmaganda, faqat ta’mirlash uchun ketadigan mablag‘. Hojiboyev (sog‘liqni saqlash vaziri)ni chaqirsam, 60 trillion so‘m kerak, deyapti. Bu pullarni qayerdan olamiz?”, — degan Prezident.
Davlat rahbari yillar davomida to‘planib qolgan bu kabi dolzarb ijtimoiy muammolarni bartaraf etish uchun, avvalo, o‘z vaqtida soliq tushumlarini ta’minlash zarurligini ta’kidlab, mablag‘larni maqsadli sarflash nazoratini kuchaytirish bo‘yicha mas’ullarga topshiriq bergan.
Izoh (0)