Surxondaryo viloyati Jinoyat ishlari bo‘yicha Oltinsoy tumani sudida mast holda qo‘shnisini haqorat qilgan tumandagi maktablardan birining direktor o‘rinbosariga jazo tayinlandi, deb xabar beradi O‘zA.
Ma’lum qilinishicha, 23-mart kuni soat 18:00 larda tumandagi maktablarning birida direktor o‘rinbosari bo‘lgan S.V. ismli fuqaro spirtli ichimlik iste’mol qilib, mast holda jamiyatda yurish-turish qoidalarini qasddan mensimay, yashash uyi oldidan o‘tuvchi ko‘chaga yarimyalang‘och holda chiqib, jamoat tartibini va hamqishloqlarining xotirjamligini buzgan.
Shuningdek, u qo‘shnisi T.Qobilovni uyatli so‘zlar bilan haqorat qilib, baland ovozda shovqin ko‘targan. Shu atrofda yashovchi fuqarolar va yo‘ldan o‘tib ketayotganlarning tinchligi, osoyishtaligini buzib, qo‘liga tosh olib, T.Qobilovni quvlab, qo‘shnisi L.Jabborovaning hovlisiga yarimyalang‘och holda kirib borgan. U yerda ham baland ovozda shovqin ko‘tarib, uyatli qiliqlar bilan mayda bezoriliklar sodir etgan.
Ochiq sud majlisida huquqbuzar – direktor o‘rinbosari shu kuni qo‘shnisi T.Qobilovning tovuqlari tomorqasiga o‘tgani uchun u bilan tortishib qolgani, spirtli ichimlik iste’mol qilib, mast holatda bo‘lgani sababli qo‘liga tosh olib, T.Qobilovni quvlaganini tan olgan. Mast bo‘lgani uchun nimalar qilganini yaxshi eslay olmayotgani, jabrlanuvchilardan kechirim so‘rashi, qilgan ishidan pushaymonligini, boshqa bunday harakatlar sodir etmasligini aytib, suddan qonuniy yengillik berishni so‘ragan.
Huquqbuzarga Ma’muriy javobgarlik to‘g‘risidagi kodeksning 183-moddasi bilan 15 sutka ma’muriy qamoq jazosi tayinlanib, qamoqda saqlangan har bir kuni uchun davlat foydasiga bazaviy hisoblash miqdorining 15 foizi miqdorida pul undirish belgilandi.
Izoh (0)