2021-yilning yarmigacha O‘zbekistonning oltita hududida umumiy qiymati 220 million dollarlik yirik to‘qimachilik korxonalari ishga tushiriladi

Prezident Shavkat Mirziyoyev raisligida 12-may, chorshanba kuni o‘tkazilgan yig‘ilishda davlat rahbari ikkinchi chorakda 75 trillion so‘mlik investitsiyalarni amalga oshirish zarurligini aytdi, deya xabar bermoqda “Daryo” muxbiri.

“Ikkinchi chorakda 75 trillion so‘mlik investitsiyalarni amalga oshirish zarur. Shundan to‘g‘ridan to‘g‘ri xorijiy investitsiya va kreditlar – 1,7 milliard dollar, xalqaro moliya tashkilotlari mablag‘lari – 1,1 milliard dollar, byudjet mablag‘lari – 8 trillion so‘m, bank kreditlari – 13 trillion so‘m.

Umurzoqov tarmoq va hudud rahbarlari bilan birga, 1-iyulga qadar ishga tushirish rejalashtirilgan 43 ta yirik tarmoq hamda 2,5 mingta hududiy loyihalar bo‘yicha haftalik nazorat tizimini joriy etadi.

Bunda “O‘zto‘qimachiliksanoat” Andijon, Buxoro, Qashqadaryo, Navoiy, Toshkent viloyatlari hokimlari bilan birga, 1-iyulgacha Asaka, G‘ijduvon, Qarshi, Xatirchi, Qibray tumanlari va Chirchiq shahrida umumiy qiymati 220 million dollarlik 6 ta yirik to‘qimachilik korxonalarini ishga tushirib, 2,5 ming nafar aholini doimiy ish bilan ta’minlash choralarini ko‘rsin”, — dedi davlat rahbari.

Prezident viloyat hokimlari muddatida ishga tushmaslik xavfi mavjud bo‘lgan 23 ta yirik loyiha bilan shaxsan o‘zlari shug‘ullanishi shartligini ta’kidladi.

“Bunday loyihalar Navoiyda – 5 ta, Buxoro va Toshkent viloyatlarida – 4 tadan, Andijon va Namanganda – 3 tadan, Qoraqalpog‘istonda – 2 ta, Sirdaryo va Farg‘onada — 1 tadan.

Mazkur viloyat rahbarlari 1-iyulgacha yangi sanoat korxonalari tashkil etish sust bo‘lgan 15 ta tumanda kamida 10 tadan loyihani boshlab, yil yakuniga qadar ishga tushiradi”, — dedi Shavkat Mirziyoyev.

Davlat rahbari birinchi yarim yillikda eksport hajmini 5,2 milliard dollarga yetkazish zarurligini ta’kidlarkan, xususan, shunday dedi:

“Bunda yanvar—aprel oylarida qishloq xo‘jaligi mahsulotlari eksporti bo‘yicha bajarilmagan 169 million dollar o‘rni ikkinchi chorakda to‘liq qoplanishi kerak. Jumladan, Farg‘ona – 50 million dollar, Andijon – 29 million dollar, Toshkent viloyati – 22 million dollar, Namangan – 17 million dollar, Samarqand – 11 million dollar.

Shuningdek, “O‘zstandart”, “O‘zto‘qimachiliksanoat” rahbarlari may—iyun oylarida kamida 10 ta to‘qimachilik korxonasida “Oyko Teks” standartlarini joriy etib, yil yakuniga qadar 50 taga yetkazsin. Bundan tashqari, ikki oy muddatda xorijiy mutaxassislarni jalb qilgan holda, “BiSiAy”, “SiYe”, “Global gap” kabi xalqaro standartlar bo‘yicha o‘quv dasturlarini ishlab chiqib, mahalliy korxonalar mutaxassislarini joylarda o‘qishini tashkil qilish zarur”.