Ijtimoiy tarmoqlarda Toshkent shahar 1-sonli tug‘ruq kompleksiga homilador ayolini olib kelgan erkak tomonidan suratga olingan videomaterial paydo bo‘ldi. Unda homilador ayolni doimiy yashash joyi boshqa yerda ekanligi vaji bilan tibbiyot muassasasiga qabul qilinmagani hamda unga shoshilinch tibbiy yordam ko‘rsatilmagani aytilgan.
SSV matbuot xizmati xabar qilishicha, mazkur masala yuzasidan sog‘liqni saqlash vaziri Abduhakim Hojiboyev tug‘ruqqa ixtisoslashgan shahar va respublika tibbiyot muassasalari bosh vrachlari ishtirokida tezkor yig‘ilish o‘tkazgan.
Shahar Sog‘liqni saqlash bosh boshqarmasiga ko‘ra, homilador ayol O.S. 2000-yilda tug‘ilgan bo‘lib, Samarqand viloyati, Ishtixon tumanida doimiy ro‘yxatda turib, hozirda Toshkent viloyati Yangiyo‘l tumanida istiqomat qiladi.
Dastlabki ma’lumotlarga qaraganda, ushbu voqea tarqalgan xabarlarda aytilganidek, mazkur voqea 5-may kuni emas, 2021-yilning 29-aprel kuni sodir bo‘lgan. Shu kuni soat 04:25 da ayolni turmush o‘rtog‘i X.M. tug‘ruq og‘riqlaridan shikoyat qilgani uchun Toshkent shahar 1-sonlki tug‘ruq kompleksiga olib kelgan.
Ammo ayolning almashuv varaqasida Yangiyo‘l tumani 69-sonli qishloq shifokorlik punktida ro‘yxatda turgani inobatga olib, dislokatsiya bo‘yicha Yangiyo‘l tumani tug‘ruq kompleksiga yoki Toshkent tibbiyot akademiyasining 1-klinikasidagi tug‘ruq bo‘limiga borish tavsiya qilingan.
Shu kuni soat 05:40 lar atrofida homilador ayol turmush o‘rtog‘i tomonidan chaqirilgan tez tibbiy yordam mashinasida Toshkent tibbiyot akademiyasining 1-klinikasi tug‘ruq bo‘limiga olib borilgan va 29-aprel kuni qiz farzand dunyoga kelgan. Tug‘ruqdan keyingi davr asoratsiz o‘tgan. 2021-yilning 3-may kuni ayol farzandi bilan ahvoli qoniqarli holatda uyiga javob berilgan.
Ushbu vaziyat sabab Toshkent shahar SSB boshlig‘ining onalik va bolalikni muhofaza qilish hamda reproduktiv salomatlik bo‘yicha o‘rinbosari R.Haitboyeva, tug‘ruq kompleksi bosh shifokori R.Olimjonova egallab turgan vazifasidan ozod etildi. Shuningdek, o‘z ishiga sovuqqonlik bilan qaragani va homilador ayolga shoshilinch tibbiy yordam ko‘rsatmagani uchun qator tibbiyot xodimlariga ham tegishli choralar ko‘rildi.
Bundan avval Jizzaxda ikki nafar homilador ayol shifokor va hamshira mas’uliyatsizligi sabab vafot etgani, Qashqadaryoda o‘quvchiga tanbeh bergan homilador o‘qituvchi kaltaklangani hamda Qashqadaryoda homilador xotini, qaynonasi va ikki nafar bolani pichoqlab o‘ldirgan erkak umrbod qamoq jazosiga hukm qilingani haqida xabar berilgandi.
Izoh (0)