Ижтимоий тармоқларда Тошкент шаҳар 1-сонли туғруқ комплексига ҳомиладор аёлини олиб келган эркак томонидан суратга олинган видеоматериал пайдо бўлди. Унда ҳомиладор аёлни доимий яшаш жойи бошқа ерда эканлиги важи билан тиббиёт муассасасига қабул қилинмагани ҳамда унга шошилинч тиббий ёрдам кўрсатилмагани айтилган.
ССВ матбуот хизмати хабар қилишича, мазкур масала юзасидан соғлиқни сақлаш вазири Абдуҳаким Ҳожибоев туғруққа ихтисослашган шаҳар ва республика тиббиёт муассасалари бош врачлари иштирокида тезкор йиғилиш ўтказган.
Шаҳар Соғлиқни сақлаш бош бошқармасига кўра, ҳомиладор аёл О.С. 2000 йилда туғилган бўлиб, Самарқанд вилояти, Иштихон туманида доимий рўйхатда туриб, ҳозирда Тошкент вилояти Янгийўл туманида истиқомат қилади.
Дастлабки маълумотларга қараганда, ушбу воқеа тарқалган хабарларда айтилганидек, мазкур воқеа 5 май куни эмас, 2021 йилнинг 29 апрель куни содир бўлган. Шу куни соат 04:25 да аёлни турмуш ўртоғи Х.М. туғруқ оғриқларидан шикоят қилгани учун Тошкент шаҳар 1-сонлки туғруқ комплексига олиб келган.
Аммо аёлнинг алмашув варақасида Янгийўл тумани 69-сонли қишлоқ шифокорлик пунктида рўйхатда тургани инобатга олиб, дислокация бўйича Янгийўл тумани туғруқ комплексига ёки Тошкент тиббиёт академиясининг 1-клиникасидаги туғруқ бўлимига бориш тавсия қилинган.
Шу куни соат 05:40 лар атрофида ҳомиладор аёл турмуш ўртоғи томонидан чақирилган тез тиббий ёрдам машинасида Тошкент тиббиёт академиясининг 1-клиникаси туғруқ бўлимига олиб борилган ва 29 апрель куни қиз фарзанд дунёга келган. Туғруқдан кейинги давр асоратсиз ўтган. 2021 йилнинг 3 май куни аёл фарзанди билан аҳволи қониқарли ҳолатда уйига жавоб берилган.
Ушбу вазият сабаб Тошкент шаҳар ССБ бошлиғининг оналик ва болаликни муҳофаза қилиш ҳамда репродуктив саломатлик бўйича ўринбосари Р.Ҳаитбоева, туғруқ комплекси бош шифокори Р.Олимжонова эгаллаб турган вазифасидан озод этилди. Шунингдек, ўз ишига совуққонлик билан қарагани ва ҳомиладор аёлга шошилинч тиббий ёрдам кўрсатмагани учун қатор тиббиёт ходимларига ҳам тегишли чоралар кўрилди.
Бундан аввал Жиззахда икки нафар ҳомиладор аёл шифокор ва ҳамшира масъулиятсизлиги сабаб вафот этгани, Қашқадарёда ўқувчига танбеҳ берган ҳомиладор ўқитувчи калтаклангани ҳамда Қашқадарёда ҳомиладор хотини, қайнонаси ва икки нафар болани пичоқлаб ўлдирган эркак умрбод қамоқ жазосига ҳукм қилингани ҳақида хабар берилганди.
Изоҳ (0)