2007-yilning yozida “Manchester Siti” ilk bor chet ellik investorlar qo‘liga o‘tadi. Tailandlik milliarder, Tailand sobiq bosh vaziri Taksin Chinnavat klubni sotib oladi va katta va’dalar beradi. O‘sha yili yozgi transfer oynasida shvetsiyalik taniqli mutaxassis Sven Yoran Eriksson bilan uch yillik shartnoma imzolanadi. Shuningdek, Vedran Chorluka, Xavyer Garrido, Jelson Fernandesh, Martin Petrov, Elano, Benjani Mvaruvori, Valeriy Bojinov kabi futbolchilar transfer qilinadi.
Mavsumni o‘rta tempda o‘tkazgan “shaharliklar” yakunda Premyer Ligada 9-o‘rin bilan tugatadi. 11-may kuni “Manchester Siti” APL so‘nggi turi doirasida o‘rtamiyona “Midlsbro”dan qaqshatqich mag‘lubiyatni qabul qilib oladi.
Uchrashuv teng kurashlar bilan boshlanadi, biroq 15-daqiqadagi vaziyat butun o‘yin taqdirini belgilab beradi. Darvozaboni bilan birga bir vaziyatga chiqib ketayotgan Tunjay Shonlini mehmonlar himoyachisi Richard Dann qo‘pollik bilan to‘xtatib qoladi va to‘g‘ridan to‘g‘ri qizil kartochkaga loyiq ko‘riladi. Penaltidan Styuart Dauning hisobni ochadi. 37-daqiqada Alfonso Alves “boro”ning ikkinchi golini uradi.
58-daqiqa Dauning Kuarejma uslubida chiroyli zarba berib, hisobni yirik ko‘rinishga olib keladi. Oradan ikki daqiqa o‘tib Alves ham dublini nishonlagan holda to‘rtinchi golni uradi. 70-daqiqada Adam Jonson tomonida yo‘llangan zarba manchesterlik futbolchiga tegib, o‘z yo‘nalishini o‘zgartiradi va darvozadan joy oladi.
Oradan o‘n daqiqa o‘tib Fabio Roshembak chamasi 30 metrdan belgilangan jarima zarbasini qoyilmaqom ijro etadi. 85-daqiqada Jaremi Alyadyer ham o‘z hisobiga gol yozdirib qo‘yadi.
Oradan ikki daqiqa o‘tib “Siti” hujumchisi Elano jamoasining yagona javob to‘pini kiritadi. So‘nggi daqiqalarda Alves het-trikni rasmiylashtirgan holda yakuniy nuqtani qo‘yadi.
APL
2007/08-yilgi mavsum
38-tur bahsi
11-may, 2008-yil
“Midlsbro” — “Manchester Siti” 8:1
Gollar: 1:0 – 16, penalti Dauning, 2:0 – 37 Alves, 3:0 – 58 Dauning, 4:0 – 60 Alves, 5:0 – 70 Jonson, 6:0 – 80 Roshembak, 7:0 – 85 Alyadyer, 7:1 – 87 Elano, 8:1 – 90 Alves.“Midlsbro”: Mark Shratser, Lyuk Yang (Entoni Makmahon, 75), Kris Riggott, Emanuel Pogatets, Devid Uiter, Xulio Arka (Adam Jonson, 62), Jorj Boateng, Fabio Roshembak, Styuart Dauning, Alfonso Alves, Tunjay Shonli (Jaremi Alyadyer, 62).
“Manchester Siti”: Andreas Isaksson, Richard Dann, Maykl Boll, Sun Szixay, Xavyer Garrido, Vedran Chorluka, Martin Petrov (Elano, 71), Stiven Ayrlend, Jelson Fernandesh, Darius Vessel (Ditmar Haman, 62), Benjani Mvaruvori (Neri Kastilyo, 13).
Ogohlantirishlar: Pogatets (21), Yang (26), Szixay (54).
Chetlatish: Dann (15).
Mavsum yakunida Eriksson iste’foga chiqariladi va uning o‘rniga Mark Hyuz olib kelinadi.
Uch haftalik muzokaralardan keyin 2008-yil yozining so‘nggi kunida “Manchester Siti” BAA qirollik oilasi vakili Shayx Mansur ibn Zaydga tegishli kompaniya tomonidan sotib olinadi. “Manchester Siti”ning undan keyingi davri bu butkul boshqa mavzu.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)