Futbol bo‘yicha Angliya Premyer Ligasining 2021/2022-yilgi mavsumi qachon boshlanish ma’lum bo‘ldi.
Liga rasmiy saytining yozishicha, yangi mavsum 2021-yilning 14-avgustida start oladi. Musobaqaning to‘liq taqvimi esa 16-iyun sanasida e’lon qilinadi. Premyer Liga 2021/22-yilgi mavsumda ham o‘z ichiga 380 uchrashuvni oladi va 2022-yilning 22-may sanasida o‘z yakuniga yetadi.
2020/2021-yilgi mavsumda “Manchester Siti” 35-turdan so‘ng 80 ochko bilan yetakchilik qilmoqda. “Shaharliklar” chempionlikni qo‘lga kiritishi uchun qolgan uch o‘yindan birida g‘alaba qozonsa yetarli bo‘ladi. Shuningdek, ikkinchi o‘rindagi “Manchester Yunayted”ning ochko yo‘qotishi ham jamoaga chempionlikni taqdim etadi.
Avvalroq “Sheffild Yunayted” va “Vest Bromvich”ning mavsum so‘ngida Chempionshipga tushib ketishi ma’lum bo‘lgandi. “Norvich” va “Uotford” esa yangi mavsumni yuqori divizionda boshlaydi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)