2007 йилнинг ёзида «Манчестер Сити» илк бор чет эллик инвесторлар қўлига ўтади. Таиландлик миллиардер, Таиланд собиқ бош вазири Таксин Чиннават клубни сотиб олади ва катта ваъдалар беради. Ўша йили ёзги трансфер ойнасида швециялик таниқли мутахассис Свен Йоран Эрикссон билан уч йиллик шартнома имзоланади. Шунингдек, Ведран Чорлука, Хавьер Гарридо, Желсон Фернандеш, Мартин Петров, Элано, Бенжани Мварувори, Валерий Божинов каби футболчилар трансфер қилинади.
Мавсумни ўрта темпда ўтказган «шаҳарликлар» якунда Премьер Лигада 9-ўрин билан тугатади. 11 май куни «Манчестер Сити» АПЛ сўнгги тури доирасида ўртамиёна «Мидлсбро»дан қақшатқич мағлубиятни қабул қилиб олади.
Учрашув тенг курашлар билан бошланади, бироқ 15-дақиқадаги вазият бутун ўйин тақдирини белгилаб беради. Дарвозабони билан бирга бир вазиятга чиқиб кетаётган Тунжай Шонлини меҳмонлар ҳимоячиси Ричард Данн қўполлик билан тўхтатиб қолади ва тўғридан-тўғри қизил карточкага лойиқ кўрилади. Пенальтидан Стюарт Даунинг ҳисобни очади. 37-дақиқада Алфонсо Алвес «боро»нинг иккинчи голини уради.
58-дақиқа Даунинг Куарежма услубида чиройли зарба бериб, ҳисобни йирик кўринишга олиб келади. Орадан икки дақиқа ўтиб Алвес ҳам дублини нишонлаган ҳолда тўртинчи голни уради. 70-дақиқада Адам Жонсон томонида йўлланган зарба манчестерлик футболчига тегиб, ўз йўналишини ўзгартиради ва дарвозадан жой олади.
Орадан ўн дақиқа ўтиб Фабио Рошембак чамаси 30 метрдан белгиланган жарима зарбасини қойилмақом ижро этади. 85-дақиқада Жареми Алядер ҳам ўз ҳисобига гол ёздириб қўяди.
Орадан икки дақиқа ўтиб «Сити» ҳужумчиси Элано жамоасининг ягона жавоб тўпини киритади. Сўнгги дақиқаларда Алвес ҳет-трикни расмийлаштирган ҳолда якуний нуқтани қўяди.
АПЛ
2007/08 йилги мавсум
38-тур баҳси
11 май, 2008 йил
«Мидлсбро» — «Манчестер Сити» 8:1
Голлар: 1:0 – 16, пенальти Даунинг, 2:0 – 37 Алвес, 3:0 – 58 Даунинг, 4:0 – 60 Алвес, 5:0 – 70 Жонсон, 6:0 – 80 Рошембак, 7:0 – 85 Алядер, 7:1 – 87 Элано, 8:1 – 90 Алвес.«Мидлсбро»: Марк Шрацер, Люк Янг (Энтони Макмаҳон, 75), Крис Ригготт, Эмануэл Погатец, Дэвид Уитер, Хулио Арка (Адам Жонсон, 62), Жорж Боатенг, Фабио Рошембак, Стюарт Даунинг, Алфонсо Алвес, Тунжай Шонли (Жареми Алядер, 62).
«Манчестер Сити»: Андреас Исакссон, Ричард Данн, Майкл Болл, Сун Сзихай, Хавьер Гарридо, Ведран Чорлука, Мартин Петров (Элано, 71), Стивен Айрленд, Желсон Фернандеш, Дариус Вессел (Дитмар Ҳаман, 62), Бенжани Мварувори (Нери Кастилё, 13).
Огоҳлантиришлар: Погатец (21), Янг (26), Сзихай (54).
Четлатиш: Данн (15).
Мавсум якунида Эрикссон истеъфога чиқарилади ва унинг ўрнига Марк Хьюз олиб келинади.
Уч ҳафталик музокаралардан кейин 2008 йил ёзининг сўнгги кунида «Манчестер Сити» БАА қироллик оиласи вакили Шайх Мансур ибн Зайдга тегишли компания томонидан сотиб олинади. «Манчестер Сити»нинг ундан кейинги даври бу буткул бошқа мавзу.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)