Европа тикланиш ва тараққиёт банки (EТТБ), Европа инвестиция банки (ЕИБ) ва Proparco (Agence Française de Développement шўъба компанияси) Ўзбекистондаги биринчи Total Eren лойиҳасини қўллаб-қувватлаш учун 87,4 миллион евро ажратмоқда. Ушбу маблағлар Самарқанд яқинида 100 мегаватт қувватга эга қуёш электр станциясини қуриш ва ишга тушириш учун сарфланади. Бу ҳақда EТТБ матбуот хизматига таяниб, «Gazeta.uz» хабар берди.
Лойиҳа компанияси Tutly Solar (Total Eren’га тегишли) томонидан ажратилаётган молиялаштириш тўплами 43,7 миллион евро миқдоридаги ЕИБ кредити ҳамда EТТБ ва Proparco компанияларининг тахминан 21,8 миллион евро миқдоридаги кредитларидан иборат.
«Бу мамлакатдаги қайта тикланадиган энергетиканинг биринчи хусусий лойиҳаларидан биридир. Ҳозирда қазилма ёқилғи электр станциялари устун бўлган Ўзбекистонда энергия балансини диверсификация қилишга ёрдам беради», — дейилади баёнотда.
Лойиҳа ҳар йили чиқарилаётган зарарли газларнинг CO2 эквивалентини 160 минг тоннага камайтиришга ва қўшимча 270 ГВт/соат электр энергиясини ишлаб чиқаришга ёрдам бериши кутилмоқда.
Ишга туширилгандан сўнг Tutly Solar томонидан ишлаб чиқарилган электр энергияси 25 йил муддатдаги электр энергиясини сотиб олиш шартномаси асосида «Ўзбекистон миллий электр тармоқлари»га сотилади.
Франциянинг Total Eren компанияси ва «Ўзбекэнерго» Самарқанд вилоятида фотоэлектростанция қуриш бўйича лойиҳани биргаликда амалга ошириш тўғрисида келишувга эришгани тўғрисида 2018 йилда хабар берилганди. Ўзбекистонда ўн йил ичида умумий қуввати 5 минг мегаватт бўлган қуёш электр станциялари қуриш режалаштирилган.
Изоҳ (0)