Surxondaryolik bloger Otabek Sattoriy ishi bo‘yicha sud yakuniy hukmni e’lon qildi, deya xabar bermoqda Oliy sud.
Qayd etilishicha, 2021-yil 10-may kuni jinoyat ishlari bo‘yicha Muzrabot tuman sudida Otabek Sattoriy (1980-yilda Termiz shahrida tug‘ilgan, blogerlik faoliyati bilan shug‘ullanadi, muqaddam sudlanmagan)ga nisbatan jinoyat ishini ko‘rib chiqish bo‘yicha ochiq sud jarayoni nihoyasiga yetdi.
Mazkur jinoyat ishi jinoyat ishlari bo‘yicha Muzrabot tuman sudi raisi T.Abdiraimov raisligida ko‘rib chiqildi.
E’lon qilingan sud hukmiga ko‘ra, Otabek Sattoriy ayblovning jabrlanuvchi N.N.ni haqorat qilgani bo‘yicha Jinoyat kodeksining 140-moddasi (haqorat qilish) 3-qismi “a” bandi bilan hamda T.K., A.X. va Z.X.ga nisbatan takroran tovlamachilik qilgani bo‘yicha Jinoyat kodeksining 165-moddasi (tovlamachilik) 2-qismi “a” bandida nazarda tutilgan jinoyatlarni sodir etganlikda aybsiz deb topilib, ushbu moddalar bilan uning harakatlarida jinoyat tarkibi bo‘lmagani sababli oqlandi.
Otabek Sattoriy Jinoyat kodeksining 139-moddasi (tuhmat) 3-qismi “a”, “g” bandlari va 165-moddasi 3-qismi “a” bandida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi (yengilroq jazo tayinlash) qo‘llanib, 59-moddasi (bir necha jinoyat sodir etganlik uchun jazo tayinlash) va 61-moddasi (jazolarni qo‘shishning hisoblash qoidalari)ga asosan tayinlangan jazolarni qisman qo‘shish yo‘li orqali uzil-kesil 6 yil 6 oy muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyalarda o‘tash belgilandi.
Ashyoviy dalil deb e’tirof etilgan 1 dona Vivo-X50 rusumli uyali telefon apparati qonuniy egasi L.T.ga, 1 dona Redmi 5+ rusumli uyali telefon apparati va 1 dona Zotac rusumli kompyuter protsessori qonuniy egasi sudlanuvchi O.Sattoriyga qaytarilishi belgilandi.
Termiz shahridagi xususiy notarial faoliyat bilan shug‘ullanuvchi notarius H.Boboqulov tomonidan 2020-yil 2-iyul kuni KSH 032769 SV sonli reyestr bilan tasdiqlangan “Termiz Eko Ekspress loyiha” MChJ rahbari T.Sh. bilan Otabek Sattoriy o‘rtasida tuzilgan Surxondaryo viloyati Termiz shahri “Ma’rifat” mahallasi Istiqlol ko‘chasi 6-uyda joylashgan 42-raqamli kvartirani O.Sattoriyga sotganligi bo‘yicha tuzilgan oldi-sotdi shartnomasi haqiqiy emas deb topildi.
Termiz shahridagi xususiy notarial faoliyat bilan shug‘ullanuvchi notarius H.Boboqulov tomonidan 2020-yil 2-iyul kuni KSH 032770 SV sonli reyestr bilan tasdiqlangan “Termiz Eko Ekspress loyiha” MChJ rahbari T.Sh bilan O.Sattoriy o‘rtasida tuzilgan Surxondaryo viloyati Termiz shahri, “Ma’rifat” mahallasi Istiqlol ko‘chasi 6-uyda joylashgan 44-raqamli kvartirani O.Sattoriyga sotganligi bo‘yicha tuzilgan oldi-sotdi shartnomasi haqiqiy emas deb topildi.
“Termiz Eko Ekspress loyiha” MChJ rahbari T.Sh.dan sudlanuvchi O.Sattoriy foydasiga jami 234 835 000 so‘m undirilishi belgilandi.
Bundan avval Prokuror suddan bloger Otabek Sattoriy uchun 11 yil qamoq jazosi tayinlanishini so‘ragani, Otabek Sattoriyga nisbatan sakkizta ayblov e’lon qilingani hamda Bosh prokuratura bloger Sattoriyning xatti-harakatlari yuzasidan 7 ta holat bo‘yicha murojaatlar kelib tushganini ma’lum qilgani haqida xabar berilgandi.
Izoh (0)