“Aviachiptalar narxi maqbul” — Uzbekistan Airways Samarqandga tashkil etilgan xab va ichki reyslar haqida

Karantin choralari yumshatilgandan so‘ng, Uzbekistan Airways respublika bo‘ylab qatnovlarni tiklashni boshladi. Kompaniya matbuot xizmatining ma’lum qilishicha, bundan tashqari, aviaqatnovlar sonini ko‘paytirish va yo‘nalishlar bo‘yicha yangi qatnovlarni yo‘lga qo‘yish yuzasidan chora-tadbirlar amalga oshirilgan.

An’anaga ko‘ra, eng ommabop yo‘nalishlar – Toshkentdan Urganchga va Toshkentdan Nukusga amalga oshirilgan parvozlardir.

Aviakompaniya Toshkentdan Termiz, Buxoro, Samarqandga muntazam qatnovlarni amalga oshirib kelmoqda va 14-maydan boshlab esa Toshkentdan Navoiyga aviaqatnovlar tiklanadi. Ushbu yo‘nalishlardagi aviachiptalar narxi:

• Toshkent—Termiz – 341 ming so‘mdan. Qatnovlar haftaning dushanba, payshanba va shanba kunlari amalga oshiriladi;
• Toshkent—Buxoro – 215 ming so‘mdan. Qatnovlar haftaning chorshanba, shanba va yakshanba kunlari bajariladi;
• Toshkent—Navoiy – 215 ming so‘mdan. Qatnovlar haftaning seshanba va juma kunlari amalga oshiriladi;
• Toshkent— Samarqand – 114 ming so‘mdan, aviaqatnovlar haftaning seshanba va shanba kunlari amalga oshiriladi.

Shuningdek, aviakompaniya qatnovlar jadvaliga Samarqanddan respublikaning boshqa viloyatlariga ham maqbul narxlarda qatnovlar kiritiladi.

Farg‘ona viloyatidan Toshkent—Farg‘ona, Toshkent—Namangan yo‘nalishlariga muntazam qatnovlar amalga oshiriladi. Ba’zi sabablarga ko‘ra, bundan bir necha yil oldin to‘xtatib qo‘yilgan Toshkent—Andijon yo‘nalishidagi havo qatnovi qayta tiklangan. Farg‘ona vodiysi shaharlariga aviachipta narxi har bir shahar uchun bir xil – Toshkentdan Farg‘ona, Namangan va Andijonga aviachipta narxi – 127 ming so‘mdan.

Uzbekistan Airways tomonidan Samarqand shahriga ikkinchi xab tashkil etildi. Bugungi kunda Samarqanddan muntazam ravishda Toshkent qatnovidan tashqari, uchta shahar – Farg‘ona, Namangan va Urganchga ham mahalliy aviaqatnovlar amalga oshirilmoqda.

Bundan tashqari, Farg‘ona vodiysi va Urganch shaharlari o‘rtasida Samarqand aeroporti orqali mamlakat bo‘ylab sayohat qilish uchun qulay tranzit qatnovlar mavjud. Shu bilan birga, Samarqandga borish va qaytish parvozlari respublika shaharlaridan Istanbulga amalga oshiriluvchi qatnovlar bilan qulay tarzda bog‘langan. Istiqbolda Rossiya shaharlari bilan muntazam aviaqatnovlar tiklangandan so‘ng, Moskva va Sankt-Peterburgga ham qulay qatnovlar yo‘lga qo‘yiladi.Avvalroq Uzbekistan Airways va yana 14 kompaniya IPO o‘tkaziladigan kompaniyalar ro‘yxatiga kiritilgani, aviakompaniya Parij, Rim va yana dunyoning 7 ta shahriga amalga oshiriladigan reyslarini yopishi to‘g‘risida xabar berilgandi.