«Авиачипталар нархи мақбул» — Uzbekistan Airways Самарқандга ташкил этилган хаб ва ички рейслар ҳақида

Карантин чоралари юмшатилгандан сўнг, Uzbekistan Airways республика бўйлаб қатновларни тиклашни бошлади. Компания матбуот хизматининг маълум қилишича, бундан ташқари, авиақатновлар сонини кўпайтириш ва йўналишлар бўйича янги қатновларни йўлга қўйиш юзасидан чора-тадбирлар амалга оширилган.

Анъанага кўра, энг оммабоп йўналишлар – Тошкентдан Урганчга ва Тошкентдан Нукусга амалга оширилган парвозлардир.

Авиакомпания Тошкентдан Термиз, Бухоро, Самарқандга мунтазам қатновларни амалга ошириб келмоқда ва 14 майдан бошлаб эса Тошкентдан Навоийга авиақатновлар тикланади. Ушбу йўналишлардаги авиачипталар нархи:

• Тошкент—Термиз – 341 минг сўмдан. Қатновлар ҳафтанинг душанба, пайшанба ва шанба кунлари амалга оширилади;
• Тошкент—Бухоро – 215 минг сўмдан. Қатновлар ҳафтанинг чоршанба, шанба ва якшанба кунлари бажарилади;
• Тошкент—Навоий – 215 минг сўмдан. Қатновлар ҳафтанинг сешанба ва жума кунлари амалга оширилади;
• Тошкент— Самарқанд – 114 минг сўмдан, авиақатновлар ҳафтанинг сешанба ва шанба кунлари амалга оширилади.

Шунингдек, авиакомпания қатновлар жадвалига Самарқанддан республиканинг бошқа вилоятларига ҳам мақбул нархларда қатновлар киритилади.

Фарғона вилоятидан Тошкент—Фарғона, Тошкент—Наманган йўналишларига мунтазам қатновлар амалга оширилади. Баъзи сабабларга кўра, бундан бир неча йил олдин тўхтатиб қўйилган Тошкент—Андижон йўналишидаги ҳаво қатнови қайта тикланган. Фарғона водийси шаҳарларига авиачипта нархи ҳар бир шаҳар учун бир хил – Тошкентдан Фарғона, Наманган ва Андижонга авиачипта нархи – 127 минг сўмдан.

Uzbekistan Airways томонидан Самарқанд шаҳрига иккинчи хаб ташкил этилди. Бугунги кунда Самарқанддан мунтазам равишда Тошкент қатновидан ташқари, учта шаҳар – Фарғона, Наманган ва Урганчга ҳам маҳаллий авиақатновлар амалга оширилмоқда.

Бундан ташқари, Фарғона водийси ва Урганч шаҳарлари ўртасида Самарқанд аэропорти орқали мамлакат бўйлаб саёҳат қилиш учун қулай транзит қатновлар мавжуд. Шу билан бирга, Самарқандга бориш ва қайтиш парвозлари республика шаҳарларидан Истанбулга амалга оширилувчи қатновлар билан қулай тарзда боғланган. Истиқболда Россия шаҳарлари билан мунтазам авиақатновлар тиклангандан сўнг, Москва ва Санкт-Петербургга ҳам қулай қатновлар йўлга қўйилади.Аввалроқ Uzbekistan Airways ва яна 14 компания IPO ўтказиладиган компаниялар рўйхатига киритилгани, авиакомпания Париж, Рим ва яна дунёнинг 7 та шаҳрига амалга ошириладиган рейсларини ёпиши тўғрисида хабар берилганди.