Prezident matbuot kotibi Sherzod Asadov 10-may, dushanba kuni o‘tkazilgan brifingda joriy haftadagi davlat rahbari qatnashadigan muhim tadbirlar haqida so‘z yuritdi, deya xabar bermoqda “Daryo” muxbiri.
“Bugun davlat xizmatlari ko‘rsatish sohasidagi islohotlar natijadorligi va kelgusidagi ustuvor vazifalar yuzasidan taqdimot bo‘lib o‘tadi.
Shuningdek, hafta davomida sog‘liqni saqlash sohasida raqamlashtirish jarayonlari hamda davlat-xususiy sheriklik asosida amalga oshirilayotgan loyihalar taqdimoti, hududlar va tarmoqlarda iqtisodiy o‘sish sur’atlarini ta’minlash masalalari bo‘yicha videoselektor o‘tkazilishi mo‘ljallangan”, — dedi Asadov.
Uning qayd etishicha, xalqaro tadbirlar rejasiga ko‘ra, hafta mobaynida Shavkat Mirziyoyev Yaponiya yetakchisi hamda mintaqadagi mamlakatlar rahbarlari bilan muloqot o‘tkazadi.
“Mana, muborak Ramazon oyi tugashiga ham oz vaqt qoldi. Shu kunlarda Prezidentga Ramazon hayitini nishonlash to‘g‘risidagi qaror loyihasi bo‘yicha axborot beriladi. Qabul qilinadigan qaror ommaviy axborot vositalarida e’lon qilinadi”, — dedi davlat rahbari matbuot kotibi.
Izoh (0)