O‘tgan hafta ijtimoiy tarmoqlarda Surxondaryo viloyatida erkak bir ayolni uning farzandining ko‘z o‘ngida urib-tepgani tasvirlangan video tarqaldi. Keyinroq viloyat IIB mazkur holat bo‘yicha surishtiruv ishlari boshlanganini ma’lum qilgandi.
Aniqlanishicha, videodagi holat Denov tumanida yuz bergan. Tumanning “Buyuk Ipak yo‘li” mahallasida yashovchi Q.S. 22-aprel kuni viloyat IIB 102 raqamiga qo‘shnisi X.G. urib tan jarohati yetkazganini ma’lum qilgan. Ushbu murojaat, shuningdek, tuman markaziy kasalxonasining 25-apreldagi xabarnomasi navbatchilik qismida qayd etilgan bo‘lib, holat yuzasidan surishtiruv harakatlari olib borilgan.
Shuningdek, fuqaro Q.S.ning murojaatlari bo‘yicha sud-tibbiyot ekspertizasi o‘tkazilgan va kaltaklangan ayolning jarohatlari yengil tan jarohati toifasiga kiradi deb xulosa chiqarilgan.
Viloyat IIBning ma’lum qilishicha, fuqaro X.G.ning uy-joy masalasida Q.S.ga nisbatan sodir etgan huquqbuzarlik Denov tuman sudi tomonidan ko‘rib chiqilgan.
Denov tuman sudining 7-may kunidagi qarori bilan fuqaro X.G. Ma’muriy javobgarlik to‘g‘risidagi kodeksning 40-moddasi (tuhmat), 41-moddasi (haqorat qilish), 52-moddasi (yengil tan jarohati yetkazish) 2-qismi, 61-2-moddaning (mulkni qasddan nobud qilish yoki unga zarar yetkazish) 1-qismi, 200-modda (o‘zboshimchalik) bilan aybli deb topilgan va unga BHMning 50 baravari miqdorida (12,2 million so‘m) jarima jazosi tayinlangan.
Ta’kinlanishicha, tomonlarga uy-joy masalasidagi nizo fuqarolik tartibida hal qilinishi tushuntirilgan.
Izoh (0)