Ўтган ҳафта ижтимоий тармоқларда Сурхондарё вилоятида эркак бир аёлни унинг фарзандининг кўз ўнгида уриб-тепгани тасвирланган видео тарқалди. Кейинроқ вилоят ИИБ мазкур ҳолат бўйича суриштирув ишлари бошланганини маълум қилганди.
Аниқланишича, видеодаги ҳолат Денов туманида юз берган. Туманнинг «Буюк Ипак йўли» маҳалласида яшовчи Қ.С. 22 апрель куни вилоят ИИБ 102 рақамига қўшниси Х.Г. уриб тан жароҳати етказганини маълум қилган. Ушбу мурожаат, шунингдек, туман марказий касалхонасининг 25 апрелдаги хабарномаси навбатчилик қисмида қайд этилган бўлиб, ҳолат юзасидан суриштирув ҳаракатлари олиб борилган.
Шунингдек, фуқаро Қ.С.нинг мурожаатлари бўйича суд-тиббиёт экспертизаси ўтказилган ва калтакланган аёлнинг жароҳатлари енгил тан жароҳати тоифасига киради деб хулоса чиқарилган.
Вилоят ИИБнинг маълум қилишича, фуқаро Х.Г.нинг уй-жой масаласида Қ.С.га нисбатан содир этган ҳуқуқбузарлик Денов туман суди томонидан кўриб чиқилган.
Денов туман судининг 7 май кунидаги қарори билан фуқаро Х.Г. Маъмурий жавобгарлик тўғрисидаги кодекснинг 40-моддаси (туҳмат), 41-моддаси (ҳақорат қилиш), 52-моддаси (енгил тан жароҳати етказиш) 2-қисми, 61-2-модданинг (мулкни қасддан нобуд қилиш ёки унга зарар етказиш) 1-қисми, 200-модда (ўзбошимчалик) билан айбли деб топилган ва унга БҲМнинг 50 баравари миқдорида (12,2 миллион сўм) жарима жазоси тайинланган.
Таъкинланишича, томонларга уй-жой масаласидаги низо фуқаролик тартибида ҳал қилиниши тушунтирилган.
Изоҳ (0)