Namangan tumanidagi MChJlardan biriga qarashli omborxonadan joynamoz materiallarini o‘g‘irlab kelgan shaxs qo‘lga olindi. Bu haqda viloyati IIB axborot xizmati xabar berdi.
Ma’lum qilinishicha, 3-may kuni Namangan tumanida yashovchi 35 yoshli fuqaro IIBga ariza bilan murojaat qilib, 20-aprel kunidan shu kunga qadar bo‘lgan vaqt oralig‘ida MChJ omborxonasida o‘g‘irlik sodir etib kelinganini bildirgan. Uning so‘zlariga ko‘ra, omborxonadan umumiy narxi 15 ming dollar bo‘lgan 135 ta o‘ramdagi joynamoz materiallari hamda kuzatuv kamerasi xotirasi o‘g‘irlab ketilgan.
Namangan tuman IIB Jinoyat-qidiruv bo‘limi tomonidan olib borilgan tezkor-qidiruv va surishtiruv harakatlari natijasida ushbu jinoyatni Namangan shahrida yashovchi 39 yoshli fuqaro sodir etgani aniqlangan va daliliy ashyolar olingan.
Mazkur holat bo‘yicha tuman IIB huzuridagi Tergov bo‘limi tomonidan Jinoyat kodeksining 169-modda (o‘g‘rilik) 4-qismi bilan jinoyat ishi qo‘zg‘atilgan.
Avvalroq Chilonzorda omborxonaga ikki marta kirib, jami 45 million so‘mlik ayollar oyoq kiyimini o‘g‘irlagan shaxs ushlangani to‘g‘risida xabar berilgandi.
Izoh (0)