Наманган туманидаги МЧЖлардан бирига қарашли омборхонадан жойнамоз материалларини ўғирлаб келган шахс қўлга олинди. Бу ҳақда вилояти ИИБ ахборот хизмати хабар берди.
Маълум қилинишича, 3 май куни Наманган туманида яшовчи 35 ёшли фуқаро ИИБга ариза билан мурожаат қилиб, 20 апрель кунидан шу кунга қадар бўлган вақт оралиғида МЧЖ омборхонасида ўғирлик содир этиб келинганини билдирган. Унинг сўзларига кўра, омборхонадан умумий нархи 15 минг доллар бўлган 135 та ўрамдаги жойнамоз материаллари ҳамда кузатув камераси хотираси ўғирлаб кетилган.
Наманган туман ИИБ Жиноят-қидирув бўлими томонидан олиб борилган тезкор-қидирув ва суриштирув ҳаракатлари натижасида ушбу жиноятни Наманган шаҳрида яшовчи 39 ёшли фуқаро содир этгани аниқланган ва далилий ашёлар олинган.
Мазкур ҳолат бўйича туман ИИБ ҳузуридаги Тергов бўлими томонидан Жиноят кодексининг 169-модда (ўғрилик) 4-қисми билан жиноят иши қўзғатилган.
Аввалроқ Чилонзорда омборхонага икки марта кириб, жами 45 миллион сўмлик аёллар оёқ кийимини ўғирлаган шахс ушлангани тўғрисида хабар берилганди.
Изоҳ (0)