AQSh prezidenti Jo Bayden Rossiyaning Ukraina bilan chegaradagi oxirgi paytdagi harakatlari uning yaqin orada mamlakat prezidenti Vladimir Putin bilan uchrashish istagiga ta’sir qilmasligini ta’kidladi. Avvalroq Vashington Moskvani janubiy chegaralarda harbiy qo‘shinlarini kuchaytirishda va Donbassdagi vaziyatni keskinlashtirishda ayblagan edi. Bu haqda “Kommersant” xabar berdi.
“Bu holat Vladimir Putin bilan yuma-yuz ko‘rishishimga ta’sir o‘tkazmaydi. Guvohi bo‘lyapmizki, avval chegaradagi harbiylar soni ko‘proq edi va ular hozir chegaradan olinmoqda... o‘tgan oyga taqqoslaganda, ularning soni sezilarli darajada kamaygan”, — dedi Bayden matbuot anjumanida. AQShning hisob-kitoblariga ko‘ra, aprel oyining o‘rtalarida Ukraina chegarasiga va Qrimga Rossiyaning 100 mingdan ortiq harbiy xizmatchilari joylashtirildi.
Oq uy rahbarining so‘zlariga ko‘ra, Rossiya prezidenti bilan uchrashuv joyi va sanasi noma’lumligicha qolmoqda. “Hozircha uchrashuv vaqti va joyi haqida aniq to‘xtamga kelganimizcha yo‘q, buning ustida ishlayapmiz”, — deb qo‘shimcha qildi u. Jurnalistlarning uchrashuv iyun oyida o‘tkazilish-o‘tkazilmasligi to‘g‘risidagi savollariga, “Ishonchim komilki, buning uddasidan chiqa olamiz”, deb javob berdi.
Jo Bayden telefon orqali bo‘lgan muloqotda rossiyalik hamkasbiga aprel oyining o‘rtasida ko‘rishishni taklif qilgan edi. Uchrashuvning aniq sanasi ma’lum qilinmagan. Oq uy ma’muriyati uchrashuvni uchinchi mamlakatda o‘tkazish taklif qilgan. Avstriya hukumati uchrashuvga mezbonlik qilishga tayyor ekanini bildirgan. Kreml uchrashuvga rasmiy javob yo‘qligini va Moskva bu taklifni o‘rganayotganini ma’lum qildi.
“Kommersant”ning xabar berishicha, Oq uy rahbari Rossiya davlat yetakchisini 15—16-iyun kunlari Yevropa mamlakatlaridan birida uchrashishga taklif qilgan. Politico nashrining ma’lum qilishicha, uchrashuv Reykyavik, Praga, Lyublyana yoki Bokuda o‘tkazilishi mumkin.
Ma’lumot uchun, Iyun oyining birinchi yarmida Amerika prezidenti davlat rahbari sifatida chet elga birinchi safarini rejalashtirmoqda. Avval u Buyuk Britaniyaga, keyin Belgiyaga boradi.
AQSh davlat kotibi Entoni Blinken Putin va Baydenning yuzma-yuz uchrashuvi ikkala mamlakat uchun ham foydali bo‘lishini aytdi.Uning so‘zlariga ko‘ra, Bayden haqiqatan ham “rostgo‘ylik va ochiqlikni muhim”, deb hisoblaydi va bu uchun eng yaxshi qadamlardan biri — shaxsan uchrashishdir.
Izoh (0)