Namangan viloyati Pop tumanida yuz bergan sel natijasida yo‘llar va bir qancha xonadonlar jiddiy zarar ko‘rgan. Bu haqda “Daryo”ga Pop tuman hokimligi axborot xizmati xabar berdi.
Qayd etilishicha, “Vodiy” mahalla fuqarolari yig‘ini 4R-215 Pungon–G‘urumsaroy–Pop yo‘nalishidagi 16–17-kilometrlarida hamda 4R-112 Farg‘ona halqa yo‘li katta suv toshqini oqibatida jarlikka aylangan.
Shuningdek, “Yangiobod” mahallasi chetidan oqib o‘tuvchi O‘g‘rijar soyida aholi tomonidan ekilgan daraxtlarni suv toshqini o‘pirib, suv o‘tish kanaliga tiqilib qolishi natijasida o‘tish yo‘lagining teng yarmi qulab, jarlik hosil qilgan.
Aholi orasida tabiiy ofat tufayli o‘lim holati qayd etilmagan. Mahalladagi soy qirg‘og‘iga yaqin bo‘lgan 8 ta xonadonga suv kirib, tomorqa ekinlariga jiddiy zarar yetkazgan.
Hozircha qishloq xo‘jaligi maydonlariga yetkazilgan zarar maydoni necha gektarligi aniq emas.
Tabiiy ofat tufayli qisman jabr ko‘rgan 8 ta xonadon egalariga viloyat va tuman hokimligi, tuman IIB, Favqulodda vaziyatlar bo‘limi, tuman Yo‘l qurilish bo‘limi, harbiy qism, tuman elektr ta’minoti korxonasi tomonidan kerakli ko‘maklar ko‘rsatilib, oziq-ovqat mahsulotlari tarqatilmoqda.
Namanganda 6-may kuni yuz bergan sel Pop—Qo‘shminor 2 temiryo‘l bekatlari oralig‘ining 106-kilometrida temiryo‘l izini loy aralashmasi ko‘mib tashlagani sababli poyezdlar harakati cheklangani haqida xabar berilgan edi. Yuz bergan holat tufayli transportlar harakati cheklandi.
“O‘zbekiston temir yo‘llari” 7-may kuni Toshkent—Andijon yo‘nalishi bo‘yicha 60-sonli poyezd reysi bekor qilinganini ma’lum qilgandi. Yo‘lovchilar sotib olgan chiptalarning puli to‘liq qiymatda vokzallar chiptaxonalarida qaytariladi yoki boshqa sanaga almashtirilishi mumkin.
Izoh (0)