Наманган вилояти Поп туманида юз берган сел натижасида йўллар ва бир қанча хонадонлар жиддий зарар кўрган. Бу ҳақда «Дарё»га Поп туман ҳокимлиги ахборот хизмати хабар берди.
Қайд этилишича, «Водий» маҳалла фуқаролари йиғини 4Р-215 Пунгон–Ғурумсарой–Поп йўналишидаги 16–17-километрларида ҳамда 4Р-112 Фарғона ҳалқа йўли катта сув тошқини оқибатида жарликка айланган.
Шунингдек, «Янгиобод» маҳалласи четидан оқиб ўтувчи Ўғрижар сойида аҳоли томонидан экилган дарахтларни сув тошқини ўпириб, сув ўтиш каналига тиқилиб қолиши натижасида ўтиш йўлагининг тенг ярми қулаб, жарлик ҳосил қилган.
Аҳоли орасида табиий офат туфайли ўлим ҳолати қайд этилмаган. Маҳалладаги сой қирғоғига яқин бўлган 8 та хонадонга сув кириб, томорқа экинларига жиддий зарар етказган.
Ҳозирча қишлоқ хўжалиги майдонларига етказилган зарар майдони неча гектарлиги аниқ эмас.
Табиий офат туфайли қисман жабр кўрган 8 та хонадон эгаларига вилоят ва туман ҳокимлиги, туман ИИБ, Фавқулодда вазиятлар бўлими, туман Йўл қурилиш бўлими, ҳарбий қисм, туман электр таъминоти корхонаси томонидан керакли кўмаклар кўрсатилиб, озиқ-овқат маҳсулотлари тарқатилмоқда.
Наманганда 6 май куни юз берган сел Поп—Қўшминор 2 темир йўл бекатлари оралиғининг 106-километрида темир йўл изини лой аралашмаси кўмиб ташлагани сабабли поездлар ҳаракати чеклангани ҳақида хабар берилган эди. Юз берган ҳолат туфайли транспортлар ҳаракати чекланди.
«Ўзбекистон темир йўллари» 7 май куни Тошкент—Андижон йўналиши бўйича 60-сонли поезд рейси бекор қилинганини маълум қилганди. Йўловчилар сотиб олган чипталарнинг пули тўлиқ қийматда вокзаллар чиптахоналарида қайтарилади ёки бошқа санага алмаштирилиши мумкин.
Изоҳ (0)