O‘zbekistonda yilning dastlabki 4 oyida 9 ta sudyaga nisbatan intizomiy ish qo‘zg‘atilgan. Bu haqda AOKAda Oliy sud mutasaddilari ishtirokida o‘tkazilgan matbuot anjumanida ma’lum qilindi.
Qayd etilishicha, tizimda 401 ta sud faoliyat yuritib kelmoqda. Shtat jadvali bo‘yicha sudyalar soni 1 331 nafarni tashkil qilib, amalda ishlab turgan sudyalar soni 1 244 nafarni (93 foiz) tashkil qiladi. Vakant o‘rinlar — 91 ta.
Sudyaning o‘rtacha oylik ish hajmi tuman (shahar) miqyosida jinoyat ishlari bo‘yicha sudlarda — 136 ta, fuqarolik ishlari bo‘yicha sudlarda — 141 ta, iqtisodiy sudlarda — 85 ta, ma’muriy sudlarda — 30 ta ishni tashkil qilgan.
Shuningdek, bu ko‘rsatkich viloyat miqyosida jinoyat ishlari bo‘yicha sudlov hay’atida — 13 ta, fuqarolik ishlari bo‘yicha sudlov hay’atida — 10 ta, iqtisodiy ishlar bo‘yicha sudlov hay’atida — 8 ta, ma’muriy ishlar bo‘yicha sudlov hay’atida — 5 ta ishni tashkil etgan.
Ma’lum qilinishicha, 2021-yil 1-choragi davomida 9 nafar sudyaga nisbatan intizomiy ish qo‘zg‘atilgan.
Bundan avval Farg‘onada nizoli holatni o‘rganayotgan ayol sudya zo‘ravonlikka uchragani, O‘zbekiston sudyalar oliy kengashi qasamyodini buzgan sud raisini vazifasidan ozod etgani hamda Andijonda sud raisi sudyalik odob-axloqini buzgani uchun ishdan olingani haqida xabar berilgandi.
Izoh (0)