«Қорақалпоғистон қишлоқ хўжалиги ва агротехнологиялар институтини ташкил этиш чора-тадбирлари тўғрисида» ҳукумат қарори қабул қилинди, дея хабар бермоқда Адлия вазирлиги.
Қарорга мувофиқ, институт 2021/2022-ўқув йилидан Тошкент давлат аграр университетининг Нукус филиали негизида ташкил этилади.
Институтда таълимнинг кредит-модуль тизими жорий этилади, шунингдек, ҳафтада беш кунлик ўқиш ҳамда ҳафтанинг шанба куни мустақил ўзлаштириш куни деб белгиланади.
2022/2023-ўқув йилидан институт тузилмасида Германия Халқаро ҳамкорлик ташкилоти билан ҳамкорликда «Геоахборот тизимлари» маркази ва лабораторияси ташкил этилади.
Шунингдек, институт ҳузурида давлат муассасаси шаклидаги «Мойли экинлар селексияси, уруғчилиги ва етиштириш агротехнологиялари» ўқув-илмий маркази фаолияти йўлга қўйилади.
Институтга хориждан ва республиканинг бошқа ҳудудларидан ишга таклиф этилган мутахассисларга Нукус шаҳрида қурилаётган арзон уй-жойлар имтиёзли шартлар асосида ажратилади.
Бундан аввал Миллий гвардия Ҳарбий-техник институти Жамоат хавфсизлиги университети этиб қайта ташкил этилгани, Қашқадарё ва Сурхондарёда Педагогика институтлари ташкил этилиши ҳамда Тошкентда Diplomat university номли хусусий университет очилиши кутилаётгани ҳақида хабар берилганди.
Изоҳ (0)