Qashqadaryo viloyatining Dehqonobod tumanida 99 yoshli Ikkinchi jahon urushi qatnashchisi Abdulhakim bobo Jabborovga Prezident nomidan maxsus sovg‘a hamda 12 million so‘m pul mukofoti topshirildi, deya xabar berdi “Daryo” muxbiri.
Ma’lum bo‘lishicha, Dehqonobod hokimi Zoir Aliqulov va Janubiy-g‘arbiy maxsus harbiy okrug xizmatchilari 5-may, chorshanba kuni tumanning Otqamar qishlog‘ida bo‘lib, 99 yoshli urush qatnashchisi holidan xabar olgan.
“Hokim Zoir Aliqulov Prezidentimizning urush qatnashchisiga atalgan maxsus bayram tabrigini o‘qib eshittirdi va davlat rahbari tomonidan berilgan sovg‘a hamda 12 million so‘m pul mukofotini ham topshirdi. Shuningdek hokim tashabbusi bilan otaxonning uyi ta’miri uchun yana 20 million so‘m pul ajratildi”, — deydi “Daryo” muxbiri bilan suhbatlashgan hokimlik axborot xizmati vakili.
Qashqadaryo viloyat hokimligi axborot xizmatining ma’lumot berishicha, ayni kunda viloyatda 22 nafar urush qatnashchisi istiqomat qiladi. Hududdagi urush qatnashchilarining eng keksa yoshlisi qamashilik Ro‘ziboy bobo Sattorov bo‘lib, otaxon ayni kunda 112 yoshini yashamoqda.
Eslatib o‘tamiz, 9-may — Xotira va qadrlash kuni munosabati bilan Prezident farmoniga ko‘ra, har bir urush qatnashchisiga 12 million so‘mdan pul mukofoti topshirilmoqda.
Izoh (0)