Davlat soliq qo‘mitasi soliq xizmati xodimlari har yili daromadlari va egaligida bo‘lgan aktivlar to‘g‘risida deklaratsiya taqdim etishi bo‘yicha majburiy talabni belgilashni nazarda tutuvchi normativ-huquqiy hujjat loyihasini ishlab chiqdi. Bu haqda qo‘mita axborot xizmati xabar berdi.
Loyihada davlat soliq xizmati organlarining barcha xodimlari 2020-yilda olgan daromadlari va egaligida bo‘lgan aktivlari to‘g‘risida 2021-yilning 1-sentabriga qadar hamda 2022-yildan boshlab har yili 1-aprelga qadar deklaratsiya taqdim etishi nazarda tutilmoqda.
Bundan tashqari, O‘zbekistonning “Davlat soliq xizmati to‘g‘risida”gi qonuniga davlat soliq xizmati organlarining barcha xodimlari zimmasiga deklaratsiya topshirish talabini yuklash va ushbu talabga rioya qilmaganlik uchun javobgarlik belgilashni nazarda tutuvchi o‘zgartirish kiritiladi.
Endilikda davlat soliq xizmati organining har bir xodimi ko‘char va ko‘chmas mulklari, boshqa aktivlari, shuningdek, hisobot yilida olgan daromadlari to‘g‘risidagi ma’lumotlarni ko‘rsatgan holda deklaratsiya taqdim etishi shart bo‘ladi.
Deklaratsiyalarni qayta ishlash natijasida olingan axborotlar shaxsga doir ma’lumotlar to‘g‘risidagi qonunchilik talablaridan kelib chiqib, jamoatchilik uchun ochiq holda maxsus “ochiq.soliq.uz” veb-saytiga joylashtirish taklif etilmoqda.
Masalan, ko‘chmas mulk bo‘yicha obyektning turi, umumiy maydoni va obyektning joylashuvi to‘g‘risidagi ma’lumotlar majburiy ravishda ko‘rsatilishi shart. Avtomobillar haqidagi ma’lumotlarda avtomashina rusumi, modeli va ishlab chiqarilgan yili aks ettiriladi.
Bundan avval O‘zbekistonda davlat xizmatchilarining sovg‘a olishi qonun bilan taqiqlanishi mumkinligi hamda Davlat xizmatchilarining daromadlarini deklaratsiya qilish to‘g‘risidagi qonun loyihasi Prezident Administratsiyasiga kiritilgani haqida xabar berilgandi.
Izoh (0)