Қашқадарё вилоятининг Деҳқонобод туманида 99 ёшли Иккинчи жаҳон уруши қатнашчиси Абдулҳаким бобо Жабборовга Президент номидан махсус совға ҳамда 12 миллион сўм пул мукофоти топширилди, дея хабар берди «Дарё» мухбири.
Маълум бўлишича, Деҳқонобод ҳокими Зоир Алиқулов ва Жанубий-ғарбий махсус ҳарбий округ хизматчилари 5 май, чоршанба куни туманнинг Отқамар қишлоғида бўлиб, 99 ёшли уруш қатнашчиси ҳолидан хабар олган.
«Ҳоким Зоир Алиқулов Президентимизнинг уруш қатнашчисига аталган махсус байрам табригини ўқиб эшиттирди ва давлат раҳбари томонидан берилган совға ҳамда 12 миллион сўм пул мукофотини ҳам топширди», — дейди «Дарё» мухбири билан суҳбатлашган ҳокимлик ахборот хизмати вакили.
Қашқадарё вилоят ҳокимлиги ахборот хизматининг маълумот беришича, айни кунда вилоятда 22 нафар уруш қатнашчиси истиқомат қилади. Ҳудуддаги уруш қатнашчиларининг энг кекса ёшлиси қамашилик Рўзибой бобо Сатторов бўлиб, отахон айни кунда 112 ёшини яшамоқда.
Эслатиб ўтамиз, 9 май — Хотира ва қадрлаш куни муносабати билан Президент фармонига кўра, ҳар бир уруш қатнашчисига 12 миллион сўмдан пул мукофоти топширилмоқда.
Изоҳ (0)