Бухоро шаҳрида 51 ёшли аёл ўзини 8-қаватдан ташламоқчи бўлди. Воқеа жойига етиб келган ИИБ ходими ҳаракати билан кўнгилсизликнинг олди олинди. Бу ҳақда «Дарё»га вилоят ИИБ масъул ходими Қувват Ярашов хабар берди.
Таъкидланишича, воқеа бугун, 3 май куни соат, тахминан, 10:00 да содир бўлган.
Айтилишича, Бухоро шаҳридаги «Файзулла Хўжаев» МФЙда яшовчи 51 ёшли аёл Н.Н. руҳиятидаги ўзгаришлар сабаб ўзини шаҳардаги Иброҳим Мўминов кўчасида жойлашган қурилиши тугалланмаган саккиз қаватли бинонинг 8-қаватидан ташламоқчи бўлган. Шаҳар ички ишлар органлари фаолиятини мувофиқлаштириш бошқармаси 2-сон ИИБ профилактика катта инспектори, катта лейтенант Иззат Мирзаев воқеадан хабар топган ва зудлик билан воқеа жойига етиб борган.
ИИБ ходими аёлга психологик тушунтириш бергач, аёл ўзини ташлаш фикридан қайтган. Шунда ходим аёлни чаққонлик билан ушлаб олган ва ҳолатнинг олдини олган. Воқеадан сўнг аёлга тиббий-психологик ёрдам кўрсатилган. Айни пайтда воқеа сабаблари ўрганилмоқда.
Изоҳ (0)