O‘zbekistonda o‘tgan bir sutka ichida 80 mingga yaqin kishi koronavirusga qarshi emlandi

O‘zbekiston hududlari bo‘ylab 30-aprel kuni jami 79 310 kishi COVID-19’ga qarshi emlandi, deb xabar bermoqda Sog‘liqni saqlash vazirligi matbuot xizmati. Bu vaksinatsiya boshlangandan beri eng yuqori ko‘rsatkichdir.

Shu tariqa ayni kungacha O‘zbekistonda koronavirus infeksiyasiga qarshi emlangan fuqarolar soni 797 781 nafarga yetdi.

30-aprel kunidagi emlash ko‘rsatkichlari bo‘yicha yuqori o‘rinlarni

• Farg‘ona viloyati (12 685 nafar),
• Andijon viloyati (10 026 nafar),
• Namangan viloyati (9397 nafar),
• Samarqand viloyati (7779 nafar) band qildi.

Ta’kidlanishicha, hozirga qadar jami emlanganlar soni bo‘yicha rekord ko‘rsatkich Farg‘ona viloyatida (117 843 nafar) qayd etilgan. Namangan viloyatida bu ko‘rsatkich 84 874 nafarni, Andijon viloyatida esa 82 262 nafarni tashkil qilmoqda.Vaksinatsiyaning ilk oyida qancha o‘zbekistonlik koronavirusga qarshi emlandi?

O‘zbekistonda koronavirusga qarshi emlash 1-apreldan boshlandi. Xususan:

• Mamlakat bo‘ylab 3 138 ta emlash punktlari va 862 ta harakatdagi tibbiy brigadalar shay holatga keltirildi.
• Hududlarga vaksinalarni tashish uchun COVAX dasturi doirasida 17 ta avtorefrijerator, 206 ta yuk tashuvchi miniven va 16 ta yengil avtotransport vositalari olib kelindi.
• Emlash jarayonlari uchun 4 ming nafardan ortiq shifokor va 11 ming nafardan ortiq o‘rta tibbiyot xodimi jalb qilindi.
• Vaksinatsiya jarayonlari uchun ZF-UZ-VAC2001 vaksinasining 1 million dozalik va AstraZeneca vaksinasining 660 ming dozalik zaxirasi shakllantirildi.

Dastlabki rejaga ko‘ra, aprel oyi davomida Toshkent va Nukus shahri hamda viloyat markazlaridagi 219 ta emlash punktlarida birinchi navbatda 65 yoshdan kattalar va koronavirus infeksiyasini yuqtirib olish xavfi yuqori bo‘lgan tibbiyot xodimlarini ixtiyoriy tarzda emlash ko‘zda tutilgan edi.

Vaksinatsiyaning ilk kunida 5018 nafar o‘zbekistonlik koronavirusga qarshi himoyalangan. Ularning 1871 nafari 65 yosh va undan oshgan aholi qatlami bo‘lsa, 3147 nafari tibbiyot xodimi edi. Vaksinatsiyaning birinchi o‘n kunligida 148 ming nafardan oshiq aholi emlangan bo‘lsa, ikkinchi o‘n kunlik yakunida 458 ming nafardan ortiq aholi emlangan.

Bir oy davomida qaysi hududda qancha aholi emlandi?

O‘zbekistonda emlash jarayonlari boshlanganda

• birinchi galda Qoraqalpog‘iston Respublikasi, viloyatlar markazlari, Toshkent shahri va boshqa katta shaharlarda ommaviy emlash tadbirlarini amalga oshirish,
• keyinchalik tuman markazlari va kichik shaharlar aholisini ommaviy emlash tadbirlarini amalga oshirish,
• undan so‘ng esa boshqa hududlarni ommaviy emlash tadbirlari bilan qamrab olish ko‘zda tutilgandi.

Keyinchalik emlanishi rejalashtirilgan xavf osti guruhiga mansub aholi qatlamida koronavirusga qarshi ertaroq emlanishga xohish paydo bo‘lsa, emlash punktlariga murojaat qilishlari va belgilangan kunda kelib emlanishlari belgilangan edi.

Ushbu reja asosida aprel oyida Qoraqalpog‘iston Respublikasi, viloyatlar markazlari, Toshkent shahri va boshqa katta shaharlarda faqatgina 65 yosh va undan oshgan fuqarolar va tibbiyot xodimlari ommaviy emlash tadbirlariga jalb qilingan bo‘lsa, keyinchalik tuman markazlari va kichik shaharlarda yashovchi aholi ham emlashga jalb etildi.

27-aprel kunidan boshlab xavf osti guruhiga kiritilgan yana uchta aholi qatlami (maktab va maktabgacha ta’lim muassasalari xodimlar, surunkali kasalligi borlar) ham emlana boshlandi. Vaksinatsiyaning ilk kunida kunlik hisobda Toshkent shahridan 1651 nafar fuqaro emlanib, hududlar bo‘yicha eng yuqori ko‘rsatkich qayd etgan bo‘lsa, keyinchalik vaksina olish bo‘yicha mutlaq yetakchilikni Farg‘ona viloyati egalladi.

Jumladan, 12-aprelda bir kunning o‘zida Farg‘onada 18 ming nafardan ortiq fuqaro emlanib, kunlik ko‘rsatkichlar bo‘yicha rekord qayd etildi.

Vaksinatsiyaning ikkinchi o‘n kunligida Farg‘ona, Namangan, Andijon va Samarqand viloyatlarida emlanish ko‘rsatkichi 40 ming nafardan oshgan edi. Ulardan keyingi o‘rinlarni Qashqadaryo, Surxondaryo va Toshkent viloyatlari egallab kelmoqda.

Aprel oyi yakuniga kelib, Farg‘ona viloyatida hududlar orasida birinchi bo‘lib 100 ming nafardan ortiq aholi emlanib, yana bir rekord qayd etildi.