1-may kuni O‘zbekiston Prezidenti Shavkat Mirziyoyev va Qirg‘iziston prezidenti Sadir Japarov telefon orqali muloqot qildi, deb xabar beradi Prezident matbuot xizmati.
Ma’lum qilinishicha, suhbatda kuni kecha o‘tgan muloqotlar davomi sifatida ikki davlat rahbarlari Qirg‘iziston—Tojikiston chegarasidagi vaziyatning rivojlanishini muhokama qilgan.
O‘z vaqtida ko‘rilgan va o‘zaro muvofiqlashgan sa’y-harakatlar tufayli davlat chegarasi qismidagi vaziyatni barqarorlashtirishga erishilgani va uning keskinlashishiga yo‘l qo‘yilmagani katta mamnuniyat bilan qayd etilgan.
“O‘zbekiston va Qirg‘iziston yetakchilari Markaziy Osiyo mintaqasidagi barcha masalalarni birodar mamlakatlar va xalqlar o‘rtasida do‘stlik, yaxshi qo‘shnichilik va sheriklik munosabatlarini mustahkamlash maqsadida konstruktiv va ishonchga asoslangan muloqot orqali birgalikda hal qilish borasida qat’iy ekanliklarini yana bir bor ta’kidladilar”, — deyiladi xabarda.
Eslatib o‘tamiz, Qirg‘iziston va Tojikiston chegarasidagi nizo Isfara daryosi yuqori oqimlaridagi “Golovnoy” suv taqsimlash punkti yaqinida boshlandi, mazkur joyni ikkala davlat vakillari ham o‘zlariniki deb hisoblaydi. 29-aprelda ikki davlat harbiylari o‘rtasida otishma sodir bo‘lgan. 30-aprel kuni Qirg‘iziston prezidenti Tojikiston bilan chegaradagi vaziyat barqarorlashganini ma’lum qildi. Qirg‘iziston Sog‘liqni saqlash vazirligining so‘nggi ma’lumotlariga ko‘ra, mojaroda jabrlanganlar soni 134 kishiga yetdi, 13 kishi vafot etdi.
30-aprel kuni Shavkat Mirziyoyev Sadir Japarov bilan Qirg‘iziston—Tojikiston chegarasidagi vaziyatni tez fursatda hal etishni muhokama qilgan. Shuningdek O‘zbekiston Prezidenti Qirg‘iziston prezidenti bilan telefon suhbatida mart oyida “Toshkentda qabul qilingan majburiyatlarni so‘zsiz bajarish muhim”ligini qayd etgan.
Izoh (0)