Qashqadaryo viloyatining Mirishkor tumanida rahbarlik qilayotgan Sherali Sanayev hokimlik vazifasi prokurorlikka nisbatan ancha og‘ir va mashaqqatli ekanligini tan oldi. Bu haqda Qarshi shahridagi Jurnalistlar uyida hokim ishtirokida bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri.
Ta’kidlanishicha, Mirishkor tumani hokimi Sherali Sanayev 29-aprel kuni Qarshi shahridagi Jurnalistlar uyida viloyatda faoliyat yurituvchi jurnalist va blogerlar bilan muloqot qilib, ularni qiziqtirgan savollarga javob bergan. Tumanda 2021-yilda amalga oshirilayotgan ishlar haqida ma’lumot bergan.
Tadbirda so‘z olgan “Daryo” muxbiri tuman hokimiga yuzlanib, uning prokuratura tizimidan hokimiyatga ishga o‘tganini, 2018-yil Qamashi tumani hokimi sifatida ish boshlashidan avval Toshkent viloyatining Bekobod tumani prokurori lavozimida ishlaganini eslatib, prokuror va hokimlik — har ikki vazifaning qay biri mas’uliyatliroq, mashaqqatliroq ekani bilan qiziqqan.
“Bu savolizga javob berish juda mas’uliyatli va og‘ir. Bugungi kunda har bir rahbar qaysi lavozimda bo‘lishidan qat’iy nazar, Prezidentmizning jamoasi hisoblanamiz. Biz bitta kemadamiz. Demakki, kim qanday vazifada bo‘lishidan qat’iy nazar, faoliyati, orttirgan tajribasi va vatanparvarligi hamda fidoyiligi bilan shaxsiy namuna ko‘rsatishi kerak. Biz ham shuning harakatidamiz. To‘g‘risini aytaman, Bekobod tumani prokurorligidan Qamashi tumani hokimi vazifasiga o‘tganimda judayam qiynalganman. O‘sha paytda hokimlik qay darajada og‘irligini bilganman. Ammo tuman aholisi qo‘llab-quvvatlagani menga kuch bergan va imkon qadar vazifamni uddalashga uringanman”, — dedi Sherali Sanayev.
Mirishkor tumani hokimi Qashqadaryoda yana 2 ta tumanga prokuror lavozimida ishlayotgan rahbarlar hokim sifatida tayinlangani unga kuch berganini, “demakki, prokuratura tizimidan chiqqan hokim sifatida bu tizim rahbarlariga hokimlikni ishonib topshirsa bo‘lar ekan, degan xulosani shakllantira oldim”, degan xulosaga kelishiga sabab bo‘lganini ta’kidladi.
“Mendan keyin ham yana 2 ta tumanga prokuror lavozimida ishlagan rahbarlar hokim sifatida tayinlangani menga kuch berdi va prokuratura tizimidagi rahbarlarga hokimlik lavozimini ishonib topshirsa bo‘lar ekan degan xulosaga kelinishiga erishdik. Ammo tan olishim kerak, prokurorlikka nisbatan hokimlik judayam og‘ir va mashaqqatli ekan”, — dedi Sherali Sanayev.
Eslatib o‘tamiz, Sherali Sanayev Qashqadaryoda prokurorlikdan hokimlikka erishgan birinchi prokuror hisoblanadi. Undan so‘ng viloyatning G‘uzor hamda Shahrisabz tumanlariga ham prokuror lavozimida faoliyat yurituvchi rahbarlar hokim etib tayinlangan.
Mavzuga doir: Ulug‘nor prokurori tuman hokimi etib tayinlandi
Izoh (0)