Қашқадарё вилоятининг Миришкор туманида раҳбарлик қилаётган Шерали Санаев ҳокимлик вазифаси прокурорликка нисбатан анча оғир ва машаққатли эканлигини тан олди. Бу ҳақда Қарши шаҳридаги Журналистлар уйида ҳоким иштирокида бўлиб ўтган матбуот анжуманида маълум қилинди, дея хабар берди «Дарё» мухбири.
Таъкидланишича, Миришкор тумани ҳокими Шерали Санаев 29 апрель куни Қарши шаҳридаги Журналистлар уйида вилоятда фаолият юритувчи журналист ва блогерлар билан мулоқот қилиб, уларни қизиқтирган саволларга жавоб берган. Туманда 2021 йилда амалга оширилаётган ишлар ҳақида маълумот берган.
Тадбирда сўз олган «Дарё» мухбири туман ҳокимига юзланиб, унинг прокуратура тизимидан ҳокимиятга ишга ўтганини, 2018 йил Қамаши тумани ҳокими сифатида иш бошлашидан аввал Тошкент вилоятининг Бекобод тумани прокурори лавозимида ишлаганини эслатиб, прокурор ва ҳокимлик — ҳар икки вазифанинг қай бири масъулиятлироқ, машаққатлироқ экани билан қизиққан.
«Бу саволизга жавоб бериш жуда масъулиятли ва оғир. Бугунги кунда ҳар бир раҳбар қайси лавозимда бўлишидан қатъий назар, Президентмизнинг жамоаси ҳисобланамиз. Биз битта кемадамиз. Демакки, ким қандай вазифада бўлишидан қатъий назар, фаолияти, орттирган тажрибаси ва ватанпарварлиги ҳамда фидойилиги билан шахсий намуна кўрсатиши керак. Биз ҳам шунинг ҳаракатидамиз. Тўғрисини айтаман, Бекобод тумани прокурорлигидан Қамаши тумани ҳокими вазифасига ўтганимда жудаям қийналганман. Ўша пайтда ҳокимлик қай даражада оғирлигини билганман. Аммо туман аҳолиси қўллаб-қувватлагани менга куч берган ва имкон қадар вазифамни уддалашга уринганман», — деди Шерали Санаев.
Миришкор тумани ҳокими Қашқадарёда яна 2 та туманга прокурор лавозимида ишлаётган раҳбарлар ҳоким сифатида тайинлангани унга куч берганини, «демакки, прокуратура тизимидан чиққан ҳоким сифатида бу тизим раҳбарларига ҳокимликни ишониб топширса бўлар экан, деган хулосани шакллантира олдим», деган хулосага келишига сабаб бўлганини таъкидлади.
«Мендан кейин ҳам яна 2 та туманга прокурор лавозимида ишлаган раҳбарлар ҳоким сифатида тайинлангани менга куч берди ва прокуратура тизимидаги раҳбарларга ҳокимлик лавозимини ишониб топширса бўлар экан деган хулосага келинишига эришдик. Аммо тан олишим керак, прокурорликка нисбатан ҳокимлик жудаям оғир ва машаққатли экан», — деди Шерали Санаев.
Эслатиб ўтамиз, Шерали Санаев Қашқадарёда прокурорликдан ҳокимликка эришган биринчи прокурор ҳисобланади. Ундан сўнг вилоятнинг Ғузор ҳамда Шаҳрисабз туманларига ҳам прокурор лавозимида фаолият юритувчи раҳбарлар ҳоким этиб тайинланган.
Мавзуга доир: Улуғнор прокурори туман ҳокими этиб тайинланди
Изоҳ (0)