O‘zbekiston Rossiyadan koronavirusga qarshi vaksina yetkazib berishni ko‘paytirishni va uni mamlakatda ishlab chiqarish imkoniyatini ko‘rib chiqishni so‘radi. Bu haqda O‘zbekiston bosh vaziri Abdulla Aripov rossiyalik hamkasbi Mixail Mishustin bilan uchrashuvda aytib o‘tdi, deb xabar berdi “Gazeta.uz”, “TASS”ga tayanib.
Shu kunlarda Qozon shahrida Yevrosiyo iqtisodiy ittifoqi hukumatlararo kengashining yig‘ilishi bo‘lib o‘tdi. Majlisda O‘zbekiston, Armaniston, Belarus, Qozog‘iston, Qirg‘iziston va Tojikiston hukumat rahbarlari ishtirok etdi.
“Sizdan uning (‘Sputnik V’- tahr.) hajmini oshirishni iltimos qilamiz. Biz shartnomaning hajmini oshirishga tayyormiz va agar O‘zbekistonda vaksina ishlab chiqarishni boshlash imkoniyati mavjud bo‘lsa, xursand bo‘lamiz”, – dedi O‘zbekiston bosh vaziri.
Abdulla Aripov ta’kidlashicha, “Sputnik V” vaksinasi bilan emlash O‘zbekistonda muvaffaqiyatli boshlangan. Sog‘liqni saqlash vazirligining ma’lumotlariga ko‘ra, 29-aprel holatiga 65 yoshdan oshgan 1255 kishi ushbu vaksina bilan emlangan.
Rossiya bosh vaziri Mixail Mishustin o‘z nutqida: “Biz ham ‘Sputnik V’ vaksinasini O‘zbekistonda ishlab chiqarishni yo‘lga qo‘yishga tayyormiz” – dedi.
Eslatib o‘tamiz, 27-aprel kuni O‘zbekistonga “Sputnik V” vaksinasining ikkinchi partiyasi 50 ming dozada olib kelindi. Shuningdek, 23-aprelga o‘tar kechasi O‘zbekistonga “Sputnik V” vaksinasining birinchi partiyasi yetkazib berilgan edi (aynan qancha miqdorda vaksina olib kelingani ma’lum qilinmagan). Qayd etish joiz, O‘zbekistonga aholini emlash uchun olib kelinadigan “Sputnik V”ning yarmini tadbirkor Alisher Usmonov moliyalashtirgan. Oldinroq ushbu vaksinadan jami 1 million doza sotib olinishi ko‘zda tutilgani ma’lum qilingan edi.
Izoh (0)