Qashqadaryo viloyati hokimi Zoir Mirzayevga birinchi o‘rinbosar tayinlandi. Bu haqda “Daryo”ga viloyat hokimligi axborot xizmati rahbari Ahror Sodiqov ma’lum qildi.
Ta’kidlanishicha, 28-aprel kuni viloyat hokimiga birinchi o‘rinbosar tayinlanishi barobarida, hokimlikning tashkiliy-nazorat guruhi rahbari ham tayinlangan.
Zoir Mirzayevning moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat Iqtisodiy taraqqiyot va kambag‘allikni qisqartirish bosh boshqarmasi boshlig‘i lavozimiga Nodir Erkayev tayinlangan bo‘lsa, Sultonmurod Donayev hokimlikning tashkiliy-nazorat guruhi rahbari lavozimini egallagan.
Ma’lum bo‘lishicha, Nodir Erkayev 1971-yil Chiroqchi tumanida tug‘ilgan bo‘lib, 2017—2018-yillarda viloyat davlat soliq boshqarmasi boshlig‘i o‘rinbosari lavozimida ishlagan. Tayinlovga qadar esa Toshkent shahar davlat soliq boshqarmasi boshlig‘ining birinchi o‘rinbosari vazifasida ishlab kelayotgan bo‘lgan.
Sultonmurod Donayev esa 1983-yil Koson tumanida tug‘ilgan bo‘lib, lavozimga qadar Koson tumani hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — iqtisodiy taraqqiyot va kambag‘allikni qisqartirish bo‘limi boshlig‘i vazifasida ishlab kelayotgan edi.
Eslatib o‘tamiz, Qashqadaryo hokimining sobiq birinchi o‘rinbosari O‘tkir Bo‘tayev Prezident Shavkat Mirziyoyev raisligida 2021-yilning 8-aprel kuni tadbirkorlikni rivojlantirish va 2021-yilda aholi bandligini ta‘minlash dasturi ijrosiga bag‘ishlangan videoselektor yig‘ilishida ishdan olingandi. Shundan so‘ng viloyat hokimligining tashkiliy nazorat guruhi rahbari Qahramon Normuhammedov ham lavozimini tark etib, Qashqadaryo viloyat Ekologiya va atrof-muhitni muhofaza qilish boshqarmasi boshlig‘i lavozimini egallagandi.
Izoh (0)